San Pedrora begira jarri dira Hibaikaren bi traineruak
Larunbateko Hondarribiko estropadan azkenak sailkatu dira emakumeak; gizonak berriz, oso txukun ari dira arraunean beren mailako ontzien artean denbora onak egiten.
Hibaikako bi ontzietako arraunlariak estropada aurretik. Argazkia: Hibaika arraun Elkartea Neurtzen ari dira Hibaikako bi traineruak gainontzeko taldeekin. Horretan ari dira talde guztiak, ligen hasierak urrun badira ere, kokatzen eta neurtzen beste taldeekin erreferentzia puntu bat hartzeko. Asteburuan jokatu zuten Hondarribiko jaitsiera, larunbat arratsaldean, zehazki. Parte hartzaileen artean izan ziren Hibaikaren senior emakumeak, eta senior gizonak.
Ateri egin zuten euriak atseden emanda estropada, hotz handiarekin, eta itsaso zail samarrean. Emakumeek ez zuten emaitzari erreparatuta egunik onena izan larunbateko hori: azkenak sailkatu ziren Hondarribiko testean. Irabazlea izan zen Arraun Lagunak baino 44 segundo gehiago behar izan zituen estropada osatzeko Iñaki Mendizabalek gidatzen duen taldeak.
Gizon seniorrak aurreko test estropadetan bezala txukun oso eta euren mailako ontzien aurretik larunbateko estropadan. Horiek ere neurria hartzen ari dira, leku eroso bat hartzeko eta pixkanaka gorako bidea egiteko. Daniel Cobjucek entrenatzen duen eskifaia fin ari da, hala erakutsi du Portugalete, Orio eta Hondarribiko jaitsieretan. Larunbateko estropadan hamabosgarren sailkatu ziren errenteriarrak, aurreko denboraldian KAE2 Ligan aritu ziren Busturialdea eta San Pedro B-ren aurretik, 01:23,11ko denbora eginda; irabazi zuen Donostiarra ontziak baino 01.39,11 gehiago behar izan zituzten errenteriarrek lanak bukatzeko.
San Pedrokoa izango da azken jaitsiera eta horri begira dira Hibaikaren bi ontziak. Sanpedrotarra Arraun Elkarteak antolatzen duen traineru jaitsiera hilaren 30ean, igandearekin, izango da badian, goizez.
Hondarribiko emaitza guztiak ikusteko klikatu hemen.
