Uraren nazioarteko egunarekin bat egin du Galtzarabordako kiroldegiak
Hilaren 22an ospatuko da Uraren Nazioarteko Eguna. Egun hori baliatu nahi dute arreta jartzeko ur gezak eta baliabide hidrikoen garapen iraunkorrak duten garrantziaren gainean.
Hilaren 22an ospatuko da Uraren Nazioarteko Eguna. Egun hori baliatu nahi dute arreta jartzeko ur gezak eta baliabide hidrikoen garapen iraunkorrak duten garrantziaren gainean. Hori horrela, Galtzarabordako kiroldegiak bat egin du egunarekin, eta ekintzak antolatu aste honetarako, gaurtik 22ra arte igerilekuan.
14 urtetik gorakoentzat 100 metroko estilo libreko lehiaketa ondu dute. Parte hartu nahi duten pertsonek, instalazioko sorosleengana jo behar dute, kronometroa jar diezaien. Igerilekuko arbelean kategoria bakoitzeko denborarik onena markatzen joango da soroslea. Ur jolasak ere antolatu dituzte; horiek 6 eta 12 urte arteko haurrentzat. Hilaren 22an, larunbatarekin izango dira, 16:30ean. Ez da beharrezkoa aldez aurretik izena ematea.
Kirol instalazioetan ura aurrezteko aholkuak ere eman dituzte, askotan matxurekin lotzen baitira horiek, baina norbanakoak ere asko egin dezakeela esan dute kontsumo ohitura errazak hartuta, ur gastua murrizteko. Inolako arrazoirik gabe irekita den iturria edo dutxa ixtea; dutxaren azpian behar den denbora baino gehiago ez egotea; xaboia erabili bitartean dutxako ura ixtea; komuna ez erabiltzea zakarrontzi gisa.
Igerilekuarekin lotuta, berriz, uraren kalitatea ez hondatzera deitu dute, “bainatu aurretik dutxa hartu, oinetakoekin ez sartu, uretan txisturik ez bota, ezta txizarik egin ere. Zenbat eta ur kalitate eskasagoa izan, orduan eta gutxiago gozatuko dugu bainuaz eta uraren higiene parametroak mantentzeko eta berritzeko ur gehiago erabili beharko dugu”.
