Don Boscoko elektronika saileko ikasleen lana saritu dute Zaragozan
Automata WOF With One Finger —hatz bakarrarekin— proiektuak lehen saria irabazi du Don Bosco Espainiako Sari Nazionalaren hogeita hemezortzigarren ekitaldian. Aixa Berasategi, eneko Rodriguez eta Urko Asensio ikasleen proiektua da eta Xabier Izquierdo irakaslearen tutoretzapean egin dute.
WOF poriektuaren arduradunak, irakaslearekin.Don Bosco LHII Don Bosco Lanbide Heziketa Institutuko Elektronika Saileko Aixa Berasategi, Eneko Rodriguez eta Urko Asensio ikasleek garatutako proiektua saritu berri dute Zaragozan egindako Don Bosco Espainiako Sari Nazionalaren hogeita hemezortzigarren ekitaldian. Automata WOF Whait One Finger (hatz bakarrarekin) automatizazio Sinplifikatua proiektu berritzailearekin lortu dute teknologien kategoriako lehen sari ospetsua. proiektua Xabier Izquierdo irakaslearen begiradapean garatu dute.
Don Bosco zentrotik jakinarazi dutenez, berrikuntza teknologikoko adituek eta enpresa eta erakunde akademiko ospetsuetako ordezkariek osatutako epaimahaiak bereziki baloratu du proiektuaren originaltasuna, aplikazio praktikoa eta ahalmen berritzaile handia, automatizazio industrialaren demokratizazioari egindako ekarpena nabarmenduta.
Proiektua “soluzio iraultzailea” dela azaldu du ikastetxeak, “prozesu industrialen programazioa nabarmen sinplifikatzen du interfaze grafiko intuitibo baten bidez. Interfaze horrek sagua eta hatza ukitzen ditu ukipen pantaila baten gainean”. Berezko programazio lengoaia bisual bati esker edozein teknikarik, programazioan esperientziarik izan gabe ere, automatizazio sistema konplexuak erraz konfiguratzea ahalbidetzen du erantsi du.
Saria, Berasategi, Rodriguez eta Asensioren “ahalegina, grina eta pertseberantziaren” emaitza dela jarri du nabarmen halaber, “Izquierdo tutoreak lagunduta”. Guztiak Don Bosco LHIIko Mantentze Elektronikoko goi mailako heziketa zikloan ari dira.
Izquierdo ere mintzatu da proiektuaren gainean, eta adierazi du uste duela WOFek aldatu egingo duela enpresek, bereziki txikiek eta ertainek, automatizazio industrialari heltzeko duten modua, “gainera, tresna didaktiko bikaina izango da Lanbide Heziketarako, automatismo industrialen irakaskuntza praktikoa erraztuz mekatronikan, automatizazioarekin eta robotika industrialarekin lotutako zikloetan, baita eraikuntza metalikoetan, soldaduran, eta galdaragintzan ere”.
Eskerrak ere eman ditu Don Boscok, zehazki Fluidal SL enpresari erreferentzia eginda, “elektropneumatikaren arloan emandako laguntzarengatik”.
Saria jaso ondoren irtenbide teknologiko berritzailea merkaturatzeko asmoa du taldeak, “horrela modernizazio teknologikoa eta hezkuntzakoa bultzatuz hainbat sektore industrial eta akademikotan”.
