Arrandegi kaleko haurreskolaren balizko itxierarekin haserre da PSE-EE
0-3 urte tartekoentzat doaneko plaza publikoak ezabatuko direla salatu dute sozialistek. Udal gobernuari erabakia berrazter dezala eskatu diote.
Pasaiako PSE-EEk jakinarazi du Trintxerpeko Arrandegi kaleko haurreskola itxiko dela. Horren kontra azaldu dira sozialistak, haserre daude. Haurreskolak partzuergoak Karmengo Amaren eskaintza osatzen du zentro horrekin duela 23 urtetik, eta 0-3 adin tarteko haurrak jasotzen ditu. “Eusko Jaurlaritzako Hezkuntza Sailak egindako proposamena da haurreskola kentzearena, EH Bilduren eta Podemosen udal gobernuaren eskariz egindakoa”, jakinarazi dute. “Gobernu taldekoek familiei azaldu beharko diete zergatik ezabatu nahi duten zerbitzua. Haien azalpena da Hezkuntza Sailak ematen zuen laguntza kendu dela”. PSE-EEk zehaztu du haurreskola horren erabiltzaileak doaneko zerbitzu publikoak behar dituztela, eta desagertzen bada, seme-alabak hezkuntza publikoan matrikulatzeko hautua galaraziko zaiela.
Balizko itxiera horren aurrean alternatiba plazaratu dute herriko sozialistek: Haurreskolak partzuergoari lagatzea zerbitzua. “Horrela jarraipena izango luke azpiegiturak, egun duen 81 plazako eskaintza mantenduz. Udal gobernuak onartu nahi duen erabakiarekin 39 plaza publiko kenduko lirateke Arrandegi kaleko lilitegitik. Besterik gabe, zerbitzua kentzea erabaki dute eta lilitegia ez sartzea Haurreskolaren sarean, nahiz eta Jaurlaritzako Hezkuntza Sailak hori eskaini”.
Kritika gobernu taldeari sozialisten partetik. “Progresista dela esaten duen eta zerbitzu publikoen alde dagoela aldarrikatzen duen udal gobernu batek erabaki hori hartzea ezin da ulertu, batez ere, gobernu hori osatzen duten taldeek publikoki defendatu dutenean 0-3 adinekoen plazak handitu behar direla, eta gainera horiek doan izan behar dutela. Orain, esaten dutenaren justu kontrakoa egin nahi dute”. Sozialisten ustea da udal haurtzaindegi hori ixtean, Pasaia-Lezo Lizeoari esleituko zaiola instalazioa. “Lizeoak egiten duen lana aitortzen dugu, baina ezin da ahaztu haien eskaintza ez dela ez publikoa ez eta doan. Horregatik ezin dugu ulertu bereziki Podemosek, eskola publiko eta unibertsala defendatzen duela esaten duen heinean, nola eman duen bere botoa ixtearen alde. Trintxerpe eta San Pedroko familiei bereziki plaza publiko eta doanekoak ukatuko dizkiete”.
Hartara, hartutako erabakia berraztertzeko eskatu dio Pasaiako PSE-EEk udal gobernuari, “bereziki Podemosi”.
