San Pedroko I. Zientzia Egunak, arrakastatsuak
Nerea Enbil sanpedrotarrak sustatuta, zientzia ardatz duten jardunaldiak egin ziren hilaren 14tik 16ra. Antolatzaileak oso balorazio ona egin du.
Nerea Enbil sanpedrotarra Bigarren Hezkuntzako irakaslea da, zientzia arloan. Irakaslea izanik, Enbil ziur da zientzia ez dela soilik ikasgelara iritsi eta teoria ematea, uste baitu zientziarekin esperimentatu egin behar dela, saiakerak egin behar direla eta harekin jolastu behar dela. Seme-alabak ere baditu, eta Eureka Zientzia Museora eraman zituenean, txundituta geratu ziren, oso gustura aritu baitziren. Bere ikasleekin zientzia ardatz duten proiektuak egin izan ditu, eta bere asmoa pauso bat gehiago ematea zen, zientzia herriratzeko. Ikasleekin egindako proiektu horiek San Pedron era xume batean gauzatu zitezkeela ikusi zuen, eta haurrei begirako I. Zientzia Egunak antolatzea erabaki zuen.
San Pedroko I. Zientzia Egunak hilaren 14tik 16ra izan ziren. Enbilek erakusketa bat, bi tailer eta dinosaurioen proiekzio bat txertatu zituen programazioan. Auto hidraulikoen eta espazio ontzien gaiak jorratu zituen tailerretan. Horrez gain, zientziarekin zerikusia duten hainbat elementu baliatu zituen.
Enbilek onartu du haurrak eta haien gurasoak oso gustura aritu zirela zientziarekin jolasean, eta I. Zientzia Egunen oso balorazio ona egin du, jende asko gerturatu baita zientziaz gozatzera. Seme-alabek ikusten zutena gurasoei erakusten zieten, eta familien artean sortutako harremanak oso politak izan direla aitortu du sustatzaileak. Horrez gain, haurrek zientzia ere dibertigarria izan daitekeela ikasi dute, eta horrek asebete egin du sanpedrotarra.
Balorazioa eta harrera primerakoak izan badira ere, Enbilek jakinarazi du Zientzia Egunen pisua bakarrik eraman duela, eta lan handia egin izan behar duela bere nahia egikaritzeko. Hurrengo urtera begira, jende gehiagoren inplikazioa nahiko luke Zientzia Egunak berreskuratzeko. Hori bai, jendea pozik ikusi duenean, esfortzuak merezi izan diola ikusi du.
Azkenik, aldarrikapen bat egin nahiko luke, esan baitu Pasaiako Udalaren laguntza falta izan zaiela jarduerak antolatzeko: “Guztia nire poltsikotik atera da, gastu guztiak nik ordaindu ditut. Udalarekin hitz egin nuen, eta oso proiektu polita iruditu zitzaien, beste barrutietara ere eraman ahal izateko; baina oraindik ez dut erantzunik jaso. Gastu handia izan da dena, baina nire ilusioa zen eta egin ahal izan dut”.
Enbilek egindakoak arrastoa utzi du San Pedron. Asteburuan zientzialari izan ziren haurren gurasoek esker mezua bidali diote hari, HITZAren bitartez: “Zorionak eman nahi dizkiogu guraso antolatzaileri bere esfortzu eta lanagatik. Primeran pasa dugu, eta nekeak hurrengo urterako gogorik ez kentzea espero dugu. Arrakasta izan dute Zientzia Egunek guraso baten iniziatibaz egin dira, arrakastaz. Hark bildu du informazioa, erakusketarako materiala lortu eta erosi du, haur eta gurasoentzako tailerrak sortu eta irakatsi… Sekulakoa izan da! Eskerrik asko!”.
