Asteburu bizia izango dute Illunbekoek
Orkestra sinfonikoak kontzertua eskainiko du larunbatean Andoainen. Musika eta txistu banda, aldiz, Usurbilen izango dira igandean.
Pasaiako hiru musika banda jardunean arituko dira asteburu honetan, hiruak Pasaiatik kanpo. Illunbe Orkestra Sinfonikoa Andoaingo Bastero Kulturgunean izango da larunbatean (hilak 22), 12:30etik aurrera. Pasaitarrak Andoaingo Udal Eskolako hari ikasleekin batera arituko dira, Joseba Garmendiaren gidaritzapean. Kontzertuko sarrera doakoa da, baina gonbidapena behar da aretora sartzeko. Gonbidapena kontzertuaren aurretik jaso beharko da, Basteroko harreran.
Illunbe Musika Bandaren eta Txistu Bandaren kontzertuak, aldiz, igandean (hilak 23) izango dira. Haien emanaldia Usurbilgo frontoian izango da, Zumarte Musika Eskolak antolatuta. 12:00etan kalejira egingo dute Usurbilgo kaleetan zehar, eta 13:00etan, kontzertua eskainiko dute frontoian. Fran Berraren zuzendaritzapean arituko dira bi bandak. Emanaldiko sarrera librea da.
