Izaskun Goñi Razkin, PPAko presidente berria
Joakin Telleriaren postua hartuko du Goñik, erretiroa hartuko baitu. Pasaiako portuaren ardura nagusia izango duen lehen emakumea izango da.
default Izaskun Goñi Razkin (Iruñea, 1972) izango da Pasaiako Portu Agintaritzako (PPA) presidente berria. Egungo presidente Joakin Telleriaren postua hartuko du Goñik, erretiroa hartuko baitu. Eusko Jaurlaritzak hilaren 25eko Gobernu Kontseiluan izendatuko du iruindarra PPAko presidente. Goñi portuaren ardura nagusia izango duen lehen emakumea izango da.
Izaskun Goñi Ekonomian lizentziatu zen Nafarroako Unibertsitatean, eta Nazioarteko Enpresa Zuzenbideko masterra atera zuen Pabeko Unibertsitatean (Frantzia). Kudeaketa, digitalizazio eta teknologia berrien arloko prestakuntza ere badu.
Industriaren arloan eman zituen lehen pausoak, Oiartzungo Docuworld enpresako esportazio-arduradun gisa eta Bizkaiko Parke Teknologikoko Optima Comunicación enpresako zuzendari nagusi gisa, zortzi urtez. Azken bi urteetan, ezagutza industriara eramaten duen NHOD Industries Frantziako berrikuntzako ingeniaritzako presidente ez-exekutibo izan da, SRT Automotiveko enpresako Aholku Batzordeko kide izateaz gain.
Akitania Berria-Euskadi-Nafarroa NAEN Euroeskualdeko Batzorde Exekutiboko kidea izan da, zortzi urtez. Bertan, lankidetza logistikoko mugaz gaindiko proiektuetan lan egin zuen eta Europako funtsen bilketan ere aritutakoa da. Nafarroako Gobernuko Garapen Ekonomikoaren Departamentuko zuzendari nagusi ere izan da zortzi urtez, eta Industria, Digitalizazio, Politika Ekonomiko, Nazioarteko Merkataritza, Europako Funts eta Lan arloez arduratu da.
