Jaizkibelgo sutea, erabat kontrolpean
Bigarren fokua, Donibane aldekoa, gaueko lehen orduetan gelditu ahal izan dute. 30 bat hektarea erre dira.
Gauean kontrolpean zen Donibaneko fokua, gaurko Jaizkibelgo sutean bizirik zen bigarren eta azkena (osteguneko 22:45ean dago idatzia albiste hau). Lehena, handiena zena, 17:30ak ingururako zuten eremutua suhiltzaileek; hura zen arriskutsuena, Hondarribiaranzko bidea hartua zuelako Lezo aldetik, eta mendian aurrera egiteko aukera gehien zituen. 13:00ak inguruan hasi da mendiko 30 bat hektarea, aldundiak emandako datuaren arabera, erre dituen sutea. Oraindik goizegi da sutea zerk eta zergatik eragin duen jakiteko. Kalteen zenbatekoa ere hektarea horietara mugatu behar da oraindik ere. Donibaneko eta udalerriko hainbat arnasgune kaltetu ditu suteak, besteak beste Alabortzako goialdea, Talaia bidea, eta Mitxintxola ingurua.
Sutearen alarma piztu eta berehala Pasaiako udaltzainak eremura joan dira. Laster batean iritsi dira ere Bidasoko eta Tolosako suhiltzaileen parkeetako dozenaka langile. Gipuzkoako basozainak ere mendian izan dira amatatze lanetan, eta Ertzaintzak nahiz herriko udaltzainek herritarren segurtasuna bermatu dute. Horiek denak suaren kontra izan direnak. Aldeko bakarra zuten garrek: hego haizea. Horrek zeharo arduratu ditu mendian suarekin aurrez aurre izan direnak. Kamioiak, zisternak, helikopteroak… Baliabiderik ez da falta izan sua itzaltzeko lurretik eta airetik. Pasaiako alkate Teo Alberro, Ingurumen zinegotzi Iraitz Pazos eta Ingurumen teknikaria ere zuzen-zuzenean izan dira sutearen gainekoak ezagutzen, eta koordinazio lanak bideratzen.
Alberro alkateak jada 16:30erako esana zuen foku handiena, Hondarribia aldera zihoana, ia kontrolpean zela. Donibanekoa eremutua zegoela, berriz, gau partean konfirmatu du Mikel Iriondo Jaurlaritzako Larrialdietako teknikariak. Orain, gauez, mendian oraindik ere zaintzaileak izango dira sua berriz ere harrotu ez dadin. Ikerketa abiatuko dute sutearen jatorria eta balizko erantzuleak aurkitzeko.
