Gora begira, geldiezin
Munttarpe Kirol Elkartearen gizonen taldeak eskura du Gipuzkoako Lehen Mailara igotzeko aukera. Hiru partida falta zaizkie ametsa egikaritzeko.
Munttarpeko kideak, lesionatu zen taldekide batekiko animo mezuekin. Munttarpe Kirol Elkartearen gizonen taldea geldiezin dabil 2024-2025 sasoian. Gipuzkoako Bigarren Mailan ari dira lehian, Txapelketarako Fasean: lider doaz, fase horretako partida guztiak irabazita (20 puntu dituzte, eta 315 gol alde, eta 244 kontra), liga bukatzeko hiru jardunaldiren faltan. Liga lehen postuan bukatuko balute Gipuzkoako Lehen Mailara zuzenean igoko lirateke; 2-5 postuen artean gelditzen direnek igotzeko bigarren plazaren aldeko play-offa jokatu beharko dute. “Gure asmoa zuzenean igotzea da”, esan du, garbi, Nagore Tolosa kirol elkartearen presidenteak.
Talde gaztea da Munttarperena. Ilusioz ari dira kantxaz kantxa. Emaitza onek ilusio hori astetik astera elikatu dute. Hala, ligako lehen fasean taldeburu izan zen Munttarpe; lezoarrek eta bere taldeko beste hiru taldek egin zuten jauzi Txapelketarako Fasera, beste multzoko beste lau talderekin batera. Lehen fase horretan, agian paseoa esatea gehiegi izan daiteke, baina erraz lortu zuten lehenengo postua. Bigarren fasean edo txapelketakoan berretsi egin du nagusitasun hori taldeak, eta igoera, ametsa baino, helburu lorgarri bihurtu da. “Azken partida etxean dugu, gugandik bi puntura bigarren den Zumaiako Pulporen kontra. Dena ondo badoa eta emaitzak aldeko baditugu agian lehenago izango dugu aukera igotzeko. Baina Pulporen kontrakoa final antzekoa izan daiteke”, zehaztu du Tolosak. Presidenteak gogoan izan ditu lesio larriak izan dituzten bi taldekideak.
Pulporen kontrakoa apirilaren 6ko asteburuan izango da, Bekoerrotan; joaneko partidan 22-25 irabazi zuten lezoarrek Zumaian. Aurretik, baina, beste bi partida izango ditu: lehena larunbatean (hilaren 22an) izango da, 17:15ean eta Bekoerrotan. Eskualdeko derbia izanen da, aurrez aurre Donibane Bonantza taldea izango dutelako berdeek: sanjuandarrak azkenaurren doaz sailkapen nagusian, 4 punturekin, eta joaneko partidan 19-25 irabazi zuen Munttarpek Donibanen. Bigarrena Bera Beraren kantxan jokatuko dutena izango da, seigarren dira haiek sailkapen nagusian (joaneko partidan 25-22 irabazi zien Munttarpek). Beraz, sailkapenari kasu egiten bazaio, aurretik bi partida irabazgarri izango ditu Munttarpek, eta horiek garaituz gero, askoz hurbilago izango dute Lehen Maila, eta beraz, agian, Pulporen kontrako partida ospakizun lehia bihur daiteke.
Beste taldeak
Gipuzkoako ligetan beste hiru talde ditu lehian Munttarpek, hiruak emakumeenak. Gipuzkoako Lehen Mailan dabilena Federazio Garaikurra lehian da egun; sasoi zaila izan dute haiek, lesioek asko markatu dutelako taldearen egitekoa. Hala ere, sailkapenaren aurre-aurrean daude, eta Nagore Tolosa presidenteak ez du baztertu Federazio Garaikurra irabazteko gai izatea. “Gizonek liga irabaztea lortzen badute, sasoiko bigarren garaikurra litzateke”, adierazi du baikor presidenteak.
Gazte Mailako taldeak arazoak izan ditu aurrera egiteko, lesioengatik, eta hainbat kidek taldea utzi behar izan dutelako.
Kadete neskak liga erdian daude. “Emakumeen taldeen artetik hoberen dabiltzanak dira”, zehaztu du Tolosak. Ondo ari dira, harrobia ziurtatua da Munttarpek.
