San Pedroko Torreatzeko galtzada harriak konpontzen ari da udala
Oinezkoen segurtasuna bermatzeko neurria da, harri asko egoera txarrean eta hondoratuta baitzeuden. Lanak bihar bukatzea aurreikusi du udalak.
Pasaiako Udala San Pedroko Torreatzeko galtzada harriak konpontzen ari da, oinezkoen segurtasuna bermatzeko. Horietako batzuk egoera txarrean zeuden, eta beste batzuk hondoratuta. Hortaz, jarduketa horiek egitea beharrezkotzat jo du udal erakundeak.
Lanak martxan daude, eta bihar (hilak 21) bukatuko dituztela aurreikusi du udalak. Obrek, gainera, ez dute trafiko aldaketarik eragingo. Lehenik eta behin, egoera txarrean zeuden galtzada harriak identifikatu, markatu eta hesiak jarri dituzte. Ondoren, galtzada harriak altxa, garbitu eta berrerabilgarriak ez direnak kenduko dituzte. Azkenik, galtzada harriak konpondu edo berriak jarri eta eremua garbitu eta txukunduko dute. Lan horiek egikaritzeko, udalak 13.500 euroko inbertsioa egin du, BEZa kanpo.
Jarduketa horiek bukatzen dituztenean, eta kalea oinezkoentzat dela jakinda, bertakoek gauez aparkatzeko tokiak margotuko dituzte. Orotara, 12 aparkaleku zuri eta bi hori margotuko dira, azken bi horiek mugikortasun arazoak dituzten herritarrei begirakoak. Azken urteetan San Pedrok bisitari asko jaso dituela adierazi du udalak, eta ibilgailuen joan-etorriak ekiditeko eta kale horren oinezko izaera bermatzeko neurria da gaueko aparkaleku berriak sortzearena. Margotze lan horietara 885 euro bideratuko ditu udal erakundeak, BEZa kanpo.
