Igandean, trafiko aldaketak Trintxerpen
Barrutiak hiru manifestazio jasoko ditu goizean, eta Euskadi etorbidea itxita egongo da 10:30etik 13:00etara bitartean.
Igandean (hilak 23) hiru mobilizazio jasoko ditu Trintxerpek. Hiruek Euskadi etorbidean eragina izango dutenez, Trintxerpeko etorbide nagusia itxita egongo da 10:30etik 13:00etara bitartean.
Lehenik eta behin, arrantza kirolaren eta euskal kulturaren defentsarako manifestazioa egingo da. 11:00etan irtengo dira San Pedrotik eta Trintxerpeko ainguraren biribilguneraino joango dira. San Pedron bukatuko dute mobilizazioa. Ondoren, 11:30ean, Arrazakeriaren eta Xenofobiaren aurkako XXVIII. Martxa aterako da alkateordetzatik, Donostiarako bidea hartzeko. Azkenik, 12:00etan, Pasaiako emakumeen borrokari omenaldiaren harira, martxa bat egingo dute Correosetik Gudari plazaraino.
Ibilgailuak Trintxerpera sartu eta San Pedroraino iristeko, Jaizkibel kaletik igo beharko dira. Trintxerpetik ateratzeko, aldiz, honakoa izango da ibilbidea: Marinos, Andonaegi eta Azkuene.
Igandeko mobilizazioek autobus zerbitzuan ere eragina izango dute. Ekialdebuseko autobusek Eskalerillasen egingo dute geldialdia. E-8 autobusa ez da San Pedroraino iritsiko, eta zerbitzua bertan behera geldituko da 10:30etik 13:00etara bitartean. Dbus zerbitzuari dagokionean, 38. lineak ibilbidea laburtuko du. Jaizkibel kaletik igo, Andonaegiko biribilguneraino iritsi eta Ulia etorbidetik itzuliko da. Ondoren, Azkuenetik jaitsiko da, ohiko ibilbidea berreskuratzeko. Manifestazioek irauten duten bitartean aingurako biribilgunean buelta emango du 38. linea horrek, eta San Pedro etorbideko 25. zenbakian hasiko du ibilbidea.
