Musikeneko ikasleen entzunaldia larunbatean
Harmonia Ederrean zikloaren barruan egingo dute entzunaldia ikasleek.
Jose Luis Ansorena zenaren artxiboko irudia, Errenteria-Oreretan jaso zuen omenaldian. Andra Mari abesbatzak emanaldi berezia antolatu du biharko, Harmonia Ederrean zikoaren barruan. izan ere Jose Luis Ansorena Beka Lehiaketara aurkeztu diren Musikeneko ikasleek egingo dute entzunaldi hori. Jose Luis Ansorena Miranda (Donostia, 1928-Iruñea, 2019) musikari, zuzendari eta ikertzaile errenteriarraren omenez antolatutakoa da.
Beka lehiaketaren bosgarren ekitaldia izango da honakoa. Andra Mari abesbatzak eta Musikenek, Euskal Herriko Goi Mailako Musika Ikastegiak antolatzen dute beka, Errenteriako Udalak lagunduta. Musikari gazteak, eta bereziki, goi mailako ikastaroetan ari direnak laguntzea du xede beka horrek batetik; bestetik, euskal kulturaren ondarea ezagutaraztea edo ondarea hornitzen jarraitzea berriak izan daitezkeen musika lanen bitartez. 2.000 euroko beka eta Errenteria-Oreretan kontzertu bat emateko konpromisoa dira saria.
Deialdia, Musikeneko Master Mailan ari diren ikasleentzat egiten da eta lehiaketan, bakoitzaren saioan, derrigor interpretatu behar izaten dute euskal musikaren obra bat.
Biharko entzunaldia Andra Mari abesbatzaren egoitzan izango da, Peñaflorida Kondearen plaza 11, 10:00etan hasita. Sarrera doakoa da.
