Familian egingo dute kirola
Egiluze ikastetxeak familia lasterketaren bosgarren ekitaldia egingo du apirilaren 5ean. Ibilbidea, 3,5 kilometrokoa izango da eta helburua ez da azkarrena izatea, bakoitza bere erritmora aritzea baizik, kirolarekin gozatuz.
Familia lasterketa aurkeztu dute gaur. Fasmiliek hartuko dituzte Errenteria-Oreretako kaleak apirilaren 5ean. Egun horretarako deitu du Egiluzek Familia Lasterketaren bosgarren ekitaldia eta gaur eman dituzte xehetasun guztiak Josune Babace HH eta LHko zuzendari pedagogikoak, Mikel Yoldi DBHko zuzendari pedagogikoa, Lucia Martinez eta Ander Simon ikasleek, eta Itsaso Cruz Hezkuntza zinegotziak.
Adin guztietako herritarrek egiteko moduko lasterketa izango dela bosgarren ekitaldi honetan ere zehaztu du Babacek, “helburua ez da azkarrena izatea edota irabaztea, familia artean kirola egitea baizik, bakoitza bere erritmora, ongi pasatzen duten bitartean”. Horrela ba, kirol eta dibertimendu une batez gozatu nahi duten adin guztietako pertsonak parte hartzera deitu ditu Egiluzeko ordezkariak. Lasterketa bostetan izango da, baina aurretik, beroketa egingo dute. Horretarako, Eureka Danceko arduradun Oliver Nestarrek zunba saioa ondu du giharrak prestatzeko.
17:00etan abiatuko da lasterketa eta herriko erdialdeko kaleak zeharkatuta abitutako puntu berean, Xabier Olaskoaga plazan bukatuko da. Egin beharreko ibilbidea, 3,5 kilometrokoa.
Lehiakortasunik gabeko jarduera dela nabarmen jarri du berriro Yoldik, “ondo pasatzeko jarduera da eta mundu guztia da irabazle. izan ere, helburua, familiarekin gozatzea da, edozein adinetan ariketa fisikoa egiteak duen garrantziaz jabetuta”. Hori horrela, eta inor bazterrean begira gelditu ez dadin, ibilbidea oinez zein korrika egin ahalko dutela parte hartzaileek jarri du nabarmen Egiluzeko ordezkariak, “aitzakiarik ez da beraz, bat ez egiteko”.
Lasterketa bukatuta, anoa postua izango dute lasterkariek zain Xabier Olaskoaga plazan. Ez hori bakarrik izerdia botatzen jarraitzeko aukera izango dute Iker Rodriguez DJak girotutako saioan.
Berrikuntza ere badu lasterketak aurten: mozorro ikusgarrienari saria emango diote. Lasterketan mediku arreta izango dute, eta selfie argazkiak egiteko eremua ere atonduko dute.
Lasterketan parte hartzeko izena eman behar da eta lasterketa egunera arte dago zabalik (klik hemen). Ikastetxeko bazkideek 6 euro ordaindu beharko dituzte, eta bazkide ez direnek 9 euro.
Hezkuntza zinegotziak Familia Lasterketaren gisakoak antolatzeak udalerriarentzat duen garrantzia jarri du nabarmen, “areago belaunaldi ezberdinak nahasten baditu”. eskerrak eman dizkie, Cruzek beraz, eta lanketarekin jarraitzera animatu. herritarrei ere egin die deia, “parte har dezaten kirola eginez ongi pasatzeko”.
