Energia txirotasuna, solaserako gai Lezon
Gaur (astelehena) energia txirotasunaren gaineko saioa egingo dute, 18:00etan hasita, Kultura Aretoan.
Iratzerrik eta Lezoko Udalak elkarlanean energia komunitatea osatzeko bidean jarraitzen dute. Goienerren aholkularitza dute horretarako. Bide horretan garrantzitsua deritzote informazioa herritarrei helaraztea, energiaren gaineko irizpideak zabaltze aldera, egungo ikuspegitik, eta formazio izaerarekin. Hala, gaurko (hilak 24, astelehena), saioa antolatu dute hiru eragileek, 18:00etan, Kultur Aretoan: energia txirotasuna izango dute solaserako gai. Informazio eta formazio saio horietatik zortzigarrena da gaurkoa.
Iazko azaroan abiatu zen Lezoko Energia Komunitatearen sorrerarako prozesua. “Iratzerri Lezo Ingurumen Elkarteak eta Lezoko Udalak bat egin zuten prozesua martxan jartzeko. Goiener kooperatibak gidatutako aholkularitza kontratatu zuen udalak eta Iratzerrirekin batera, herriko hainbat eragile, auzokide eta enpresek prozesurako lankidetza egin dute. Ordutik, zazpi saio egin dituzte, hainbat gai jorratuz, herriaren egoera ezagutu eta komunitatea osatzeko pausuak emateko”, azaldu dute udaletik. Iratzerri horren aurretik jada hainbat urrats eginak zituen.
Iratzerriko kideek azaldu dute esku artean proiektuak dituztela. “Gauzagarri” izango den egitasmoarekin lanean ari dira, datozen asteetan jakinaraziko dutena.
