Arrain lonjara bisita eta hondakin bilketa, Materrekin
Materrek hitzordu bikoitza proposatu du aste honetarako. Ostegunean arrain lonjara egingo dute bisita, eta igandean hileroko itsas hondakin bilketa egingo dute Alabortza senadian.
Mater ontzi museo ekoaktiboak hitzordu bikoitza proposatu du aste honetarako. Alde batetik, ostegunean (hilak 27) arrain lonjara bisita egingo da. Parte hartzaileek arrainak zer bide egiten duen ikusiko dute, arrantzaleek lonjara eramaten dutenetik arrandegira iristen den arte. Horrez gain, arrain enkantea ikusi eta lonjaren egunerokoan dagoen jarduera bizia ezagutuko dute bertaratzen direnek. Bisita 05:50etik 07:20ra bitartean izango da, eta 15 euroko kostua du.
Bestalde, igandean (hilak 30) hileroko itsas hondakin bilketa herrikoia egingo da Donibaneko Alabortza senadian, 11:00etatik 13:30era. Hondakin bilketak herritar zientzia, ingurumenaren babesa eta natura uztartzen dituela adierazi dute antolatzaileek.
Jardueretan parte hartzeko beharrezkoa da aurrez izena ematea 619 81 42 25 telefono zenbakian edota helbide elektroniko bidez.
