Udaberriari ongietorria emango diote Meipin
Meipiko Jai Batzordeak eta Xantixa Kultur Elkarteak Udaberri Festa egingo dute apirilaren 5ean. Eragileek egun osoko programazioa ondu dute udaberriari ongietorria emateko.
Argazkia: Meipiko Jai Batzordea. Meipiko Jai Batzordeak eta Xantixa Kultur Elkarteak Udaberri Festa egingo dute apirilaren 5ean (larunbata), loreen itzulera ospatzeko. Sanjuandarrek festa giroan emango diote ongietorria udaberriari, eta eragileek egun osoko programazioa ondu dute.
Egun handia apirilaren 5ekoa bada ere, jarduerak apirilaren 4an (ostirala) hasiko dira, Meipiko II. Futbolin Txapelketa hasiko baita Meipi tabernan. Ostiralean kanporaketa fasea jokatuko da, 19:00etatik aurrera, eta larunbaterako utziko dituzte finalerdiak eta finala. Izen emateak Meipi tabernan egin behar dira, apirilaren 3a baino lehen, eta bikote bakoitzak 10 euro ordaindu beharko ditu parte hartzeko. Irabazleek sariak izango dituztela aurreratu dute antolatzaileek.
Larunbatean, sanjuandarrak goizetik murgilduko dira festa giroan. 11:30ean, haurrek eskulanak egingo dituzte, Meipiko plazan. Ondoren, 13:00etan, Meipiko II. Futbolin Txapelketaren azken fasea jokatuko da Meipi tabernan. Futbolin partidak jokatuta, sabelak betetzeko unea iritsiko zaie sanjuandarrei, 14:30ean bazkari herrikoia egingo baitute karpan. Helduen menuak 15 euroko prezioa du, eta honakoak dastatuko dituzte: zizka-mizkak, oilasko errea, postrea, kafea, ogia eta edaria. Haurren menuak, aldiz, 5 euroko kostua du, eta honakoak jango dituzte: makarroiak, postrea, ogia eta edaria. Bazkariko tiketak Irune, Juantxo, Meipi, Pari Berri eta Patxiku tabernetan eskura daitezke, apirilaren 1a baino lehen. Bazkariaren ondoren, bingoa egingo dute.
Sabelak bete ondoren, programazioak jarraipena izango du arratsaldean. 18:00etan, Kiler 18 txarangak dantzan jarriko ditu sanjuandarrak. Eguna bukatzeko, DJ batek Meipiko plaza girotuko du.
Udaberri Festaren egitaraua
Apirilak 4, ostirala:
- 19:00: Meipiko II. Futbolin Txapelketaren kanporaketa fasea, Meipi tabernan.
Apirilak 5, larunbata:
- 11:30: Haurrentzako eskulanak, Meipiko plazan.
- 13:00: Meipiko II. Futbolin Txapelketaren finalerdiak eta finala, Meipi tabernan.
- 14:30: Bazkari herrikoia, karpan. Ondoren, bingoa.
- 18:00: Kiler 18 txaranga.
- Ondoren: DJa txosnetan.
