Gamongoa proiektuari "berehala heltzeko" eskatu du PSE-EEk
Proiektu hori ezinbestekoa jo dute sozialistek "babestutako etxebizitzaren eskaintza handitu eta familia askoren egoera arintzeko".
Gamongoa proiektuari heltzeko eskatu du PSE-EEk.PSE-EE Gamongoa proiektua “urgentziaz heltzeko” eskaera egin du alderdi sozialistak. Ezinbestekoa jo du PSE-EEk proiektu hori berrartzea, “babestutako etxebizitzaren eskaintza handitu eta udalerriko familia askoren egoera arintzeko”. Etxebizitza larrialdirik larriena bizi du egun Errenteria-Oreretak sozialisten esanetan, “ez da alokairuzko etxebizitza eskaintzarik herrian, eta horrek egoera jasanezina suposatu du familia askorentzat, batez ere gazteentzat. Azken horiek ez dute eskuragarri aukerarik, eta beste herrietara jo behar dute bizitza duina aurkitzeko”.
Gamongoa proiektua 2007an onartu zela azaldu dute sozialistek, “700 etxebizitza eraikitzea aurreikusten zuen, horietatik ia %75 babestuak”. Proiektua “blokeatuta” izatea egotzi dio EH Bilduri, “nagikeriaz jokatzen ari da. Duela hiru urte, zuzenketa batek babestutako etxebizitza kopurua murriztea onartu zuten, eta oraindik ez dira bertan lanak hasi”..
Beste datu bat eman dute sozialistek: “Errenterian babestutako etxebizitza kopurua %4,2koa da Gipuzkoako %6,3koaren azpitik. Astigarragan %14,9koa da, Hernanin %10,9koa, Lezon %6,2koa eta Donostian %6,4koa”. Ezberdintasun horrek, “politika eraginkor baten falta” agerian uzten du sozialisten esanetan, “eta Gamongoa bezalako proiektuak luzatu gabe egitea behar-beharrezkoa bilakatzen du”.
HAPO Hiri antolaketarako Plan Orokorraren falta ere hizpide izan dute, “ez dago eguneratua. Horrek ere eragin du bereziki etxebizitza politikan”.
