Aparkalekuaren Ordenantza behin betiko onartu da
Araudia astearteko osoko bilkuran atera zen aurrera, udal gobernuaren aldeko bozkekin. Araudia GAOn publikatu eta hurrengo egunera sartuko da indarrean, fasekako aplikazioarekin.
Pasaiako Udalak behin betiko onarpena eman dio Aparkalekuaren Ordenantzari. Neurri hori astearteko osoko bilkuran onartu zen. Araudi horrek udal gobernuaren aldeko bozkekin (EH Bildu eta Podemos) ikusi du argi berdea, oposizioak araudiaren kontra bozkatu baitzuen. Plenoak araudia onartuta, ordenantza Gipuzkoako Aldizkari Ofizialean (GAO) publikatuko da. Araudia GAOn publikatu eta hurrengo egunera sartuko da indarrean, fasekako aplikazioarekin.
Araudian zehazturiko sektore bakoitzerako ezarritako aparkaleku arauak progresiboki jarriko direla martxan jakinarazi du udalak. Hauexek dira udalak aurreikusi dituen epeak:
- Torreatze (S-SP2 sektorea), Azkuene 42 (S-ST2) eta Donibaneko Alde Zaharra (S-D2) sektoreak: ordenantza indarrean sartu eta hilabetera.
- Antxo (S-SA1 sektorea): ordenantza indarrean sartu eta hiru hilabetera.
- San Pedro (S-SP1 sektorea), Donibane (S-SD1 sektorea) eta Trintxerpe (S-ST1 sektorea): ordenantza indarrean sartu eta bost hilabetera.
Txartelak eskuratzeko eskaerak ere modu mailakatuan egin beharko direla adierazi du udalak, sektore bakoitzeko bizilagunentzako zehaztutako epe eta guneetan. Udalak informazio hori helaraziko die eragindako bizilagunei, dagokien eskaera aldia zabalik denean.
