Urteko lehen bainua, Xoxolurrekin
Lezo-Ulia-Donostia bidea egiteko txangoa antolatu du Xoxolur Mendi Klubak apirilaren 6rako. Eguraldiak utziko balu, Zurriolan bainatzeko aukera legoke.
Xoxolurreko hainbat kide, iazko otsailean, Ulia aldean. Mendi, lur eta itsaso artean bizi dira Xoxolur Mendi Klubeko kideak. Airea ere, posible balitz, bere egingo lukete familia giroan eta euskaraz. Landu duten hurrengo proposamenean ez dira urrunera joango, Lezo-Ulia-Donostia bidea egin nahi baitute apirilaren 6an. Tokikoaz gozatzeko bidaia izango denez, zer hobe eta ibilaldiaren bukaeran Zurriolako hondartzan bainutxoa hartzea baino. Eguraldi ona balitz, aukera hori legoke. Xoxolurrekoek behintzat apirilaren 6korako aholkuen artean bainujantzia eta toalla eramateko eskatu diete irteerarekin bat egin nahi dutenei. Urteko lehen bainua Xoxolurrekin? Zergatik ez?
Goizeko ibilaldia izango da Xoxolurren sasoiko zazpigarrena izango dena. 09:00etan abiatuko dira Ijurkotik Gipuzkoako hiribururantz. Txikienen erritmoa errespetatzea, ezinbesteko baldintza txangoan Hala, toalla eta bainatzeko jantziez gain, mendiko arropa erosoa eramateko gomendioa egin dute mendizaleek, eta ura nahiz hamaiketakoa ez ahazteko. Doan da irteera, baina Mugi txartela eramatea komeni da Donostiatik Lezorako buelta garraio publikoan egingo dutelako.
Irteeran izena emateko aukera apirilaren 3ra arte (osteguna) izango da zabalik. Eragilearen posta elektronikora mezua bidai behar da izena emateko, txangozaleen kopurua eta izen-abizenak jarrita.
