Aste honetako hirugarren greba eguna dute hezkuntza publikoko irakasleek gaur
Elkarretaratzeak egiten ari dira langileak ikastetxeen atarietan. Akordiorik ezean, apirilaren 1 eta 2an ere greba egingo dute irakasleek.
Don Boscoko irakasleek elkarretaratzea egin dute gaur zentrora sartzeko errepidean.Grebalariek bidalitakoa Bizkai, Araba eta Gipuzkoako hezkuntza publikoko irakasleek aste honetako hirugarren greba eguna dute gaurkoa. Oarsoaldean ere eragin oso nabarmena izaten ari da irakasleen borrokaldia. Astelehen arratsaldean hasi eta astearte goizaldera arte Eusko Jaurlaritzako Hezkuntza Sailarekin izandako azken negoziazioek ez zuten ase sindikatuen eskaeren zerrenda, eta horregatik, aste honetarako grebaldia mantentzea erabaki zuten Esteilas, LAB, ELA eta CCOO sindikatuek. Akordiorik ezean, apirilaren 1 eta 2rako ere deitu dituzte greba egunak. Gaur goizean, zentro publikoen atarietan elkarretaratzeak egiten ari dira langileak.
Asteartean egin zuten lehenengoz aste honetan greba irakasleek. Atzo jarraitu zuten, eta gaur ere eutsi diote protestaldiari. Irakasleen egungo lan hitzarmena 2010ekoa da; hots, hamabost urte daramatzate itun berarekin. Langileen ordezkariek ikusten dute zer hobetua: besteak beste, lan zamak arintzeko neurri zehatzak adostea, erretiroa hartzeko baldintzak hobetzea, galdutako erosahalmena berreskuratzea, eta enplegu publikoa bermatu eta lanpostuak egonkortzea.
Asteartean, grebaren jarraipena zenbatekoa den jaso zuen HITZAk datu bidez. Behekoak dira astearteko datu orokorrak. Zenbateko horiek atzo eta gaur artean aldatzeko aukera izan da. Beraz, ikastetxeetako zuzendaritzek, sindikatuek edo irakasleek datu eguneratuak balituzte, hedabide honetara bidaltzeko aukera dute posta elektroniko bidez, edo whatsapp bidez (678 687 125). Mobilizazioen irudiak bidali nahi izatekotan ere bide horiek erabil ditzakete.
Grebaren jarraipena Oarsoaldean, ikastetxez ikastetxe (astearteko datuak dira).
Pasaia
- Karmengo Ama Ikastexea: %67.
Lezo
- Lezo Institutua: %85.
- Lezo Herri Eskola: %80.
Oiartzun
- Elizalde Herri Eskola: %95 inguru.
- Elizalde Institutua: %50.
Errenteria-Orereta
- Koldo Mitxelena Institutua: %55,42
- Koldo Mitxelena Ikastetxea: %86
- Bizarain Ikastola: %38.
- Bizarain Institutua: %59.
- Cristobal Gamon Ikastetxea: %70 inguru.
- Don Bosco Lanbide Heziketa Ikastetxea: %35,12.
Errenteria-Oreretako Koldo Mitxelena Ikastetxeko irakasleak, gaur, elkarretaratzean. Argazkia: Maddi Goikoetxea.
