Lonja gaineko lorategia berritu eta edertzeko, 1.250tik gora lore eta landare
Pasaiako Udalak herritarrei eskatu die zain dezatela eremu hori. 15.253 euroko inbertsioa egingo dute bertan
Udaleko langileak, lonja gaineko lore eremuaren antolaketa lanean.Pasaiako Udala 
Zulatutako eremuetako bat, lonjan. Argazkia: Pasaiako Udala.
Erabat biziberrituko dituzte San Pedroko lonjaren gainaldeko eremu publikoko lorategiak. Horiek berritu eta edertuko ditu Pasaiako Udalak 1.250tik gora lore eta landare jarrita. 15.253 euroko kostua du hirigintza operazioak. Jada jarrita daude lore multzoak ezarriko diren eremuak; bihartik aurrera (hilak 28, ostirala) hasiko dira lorezainak landaketekin: 290 metro koadroko azaleran eragingo dute. Bederatzi espezietako lore eta landareek edertuko dute jada herritarrentzat arnasgune den eremua.
Udalak badu kezkarik, ordea. Izan ere, lorezaintza arloko langileek detektatua dute zaila izaten ari dela eremu horretako lorategi eta berdeguneak behar bezalako egoeran mantentzea. “Belardietan zuloak antzeman dituzte langileek, eta bertako lurrak harrotuta nahiz gorotzekin”, zehaztu du udalak. Beraz, herritarrei arrantza azpiegituraren gaineko zabalgunea arduraz zain dezatela eskatu die udal erakundeak herrikideei eta bisitariei.
Txakurren jabeei dei berezia egin die udalak, halaber “Indarrean den araudiaren arabera, txakurrak lotuta eraman behar dira espazio publikoetan”, esan du. Hori gogorarazteko kartelak eta seinaleak jarri dira. “Txakur jabeei laguntza eskatu nahi diegu lorategiak mantentzeko eta bizilagun guztientzako espazio atseginagoa sortu ahal izateko”.
