Beste espazio bat irabazi dute emakumeek herrian
Txoko Feminista izango du gaurtik aurrera Andreone Lezoko Udal Liburutegiak. Gune berri bat atondu dute, inori lekurik kendu gabe. Udalaren Berdintasun Planean jasotako ekintzen artean da gunea sortzearena.
Andreoneko goiko solairuan dago Txoko Feminista Bi bereizgarri ditu Andreone Lezoko Udal Liburutegiak duen gune berriak. Apalategia albotik albora zinta more batek zeharkatzen du; horren hasieran, Feminismoa hitzarekin karteltxoa. Bereizteko baino, batzeko eremua izango da. Izan ere, gaurtik, Txoko Feminista izango baitu kulturaren gordailuak. Berdintasuna ardatz duten argitalpenak bilduko dira bertan, gehienetan jendartean eta eremu publikoetan ikusezin den horri tartea emateko. Gaur aurkeztuko dute txokoa, 19:00etan Andreonen bertan egingo den ekitaldiarekin. Horren barruan, Nere Loiola Pikazak Zebrak eta bideak liburua aurkeztuko du, Irati Zubiaren dinamizazioaren laguntzaz 18:00etan, liburutegiko sotoan.
Txokoa atontzeko ez diote inori edo ezeri tokia kendu. Alderantziz. Espazio bat irabazi du Txoko Feministak. Aurretik zen apalategi bati beste pisu berri bat erantsi diote. Espazio bat irabazi dute emakumeek. «Lezoko Udaleko Berdintasun Planak jasotako ekintzetakoa izan da txokoa sortzea. Feminismoarekin, emakumeekin, berdintasunarekin lotutako liburuen eta edukien atala izatea da horren helburua», azaldu du Mireia Kuesta Unzain Berdintasun zinegotziak. Martxoaren 8rako herriko eragileek eta udalak sortu zuten egitarauaren barruan kokatu dute egitasmoa; horren barruan, beste espazio bat irabazi zuten Lezoko emakumeek: Miren Gezala Sagarzazuren aitortzarako plaza.
«Garrantzitsua da emakumeen ikusgarritasunari bultzada ematea. Miren Gezalaren plazaren kasua bezala, sinisten dugu egin beharreko lana dela presentzia izatearena», zehaztu du zinegotziak. Hala, liburutegiko goiko solairuko guneak jada edukiak baditu ere, hori apurka osatzen eta handitzen joango direla adierazi du Kuestak.
Udal ordezkariak aipatu du herriko mugimendu feministaren ezinbesteko aholkularitza eta laguntza izan duela bai Txoko Feminista osatzeko, bai eta berdintasuna ardatz duten bestelako ekintza eta ekitaldiak adosteko ere, beti elkarlanean.
