'Nahastumbury' bihurtuko da gaur Antxoko Kultur Etxea
Bokale Gazte Elkarguneak antolatuta, Barrexerkaren ikuskizunaz gozatzeko aukera izango da Antxoko aretoan 19:00etatik aurrera.
Euskarazko kalitatezko kultur eduki erreferentzialak gazteentzat batez ere, baita herritar ororentzat ere. Hori, besteak beste, Bolakeko Gazte Elkargunearen xedeetako bat da. Gaur irizpide horiekin bat egiten duen antzerki eta umore ikuskizuna jasoko du Antxoko Kultur Etxeak: Barrexerkak Nahastumbury obra taularatuko du Antxoko Kultur Etxean. 19:00etan hasiko da emanaldia. Sarrera doan da, baina besaulkien okupazioa neurtze aldera aurrez erreserba egitea aholkatu du Bokalek. Litekeena da jada tiketik ez izatea. Euskarazko antzerkiaren gozamenak merezi du sold out bat.
Honakoak dio umorezko emanaldiaren sinopsiak: “Pertsona batek, laguntasun batek, boligrafo batek, untxi batek, lokal batek… Guztiak du bere historia. Ezberdina izaten da, ordea, benetako historia eta horretaz gogoratzen dena. Auzoko bizilagunek teoria hori egiaztatzen dute maiz, baina ezin daiteke asko fidatu haien ahotik irteten denaz. Froga gehiago behar izanez gero Nahastunbury-ra joateko gonbita luzatzen dute, non guztia argituta edo erabat nahastuta irtengo den bertaratutako pertsona”. Horra gaurkoaren laburpena. Nola ez, zuzenean ikustea testu zati hau irakurtzea baino gozagarriago izango da.
