Traineruei termometroa jartzeko azken aukera, igandean San Pedron
Traineruen hozberoa neurtzeko azken aukera etzi izango da badian. San Pedroko XVI. Test Estropada 11:00etan hasiko da, 41 trainerurekin.
San Pedroko traineru bat, Hondarribiko test estropadan.Sanpedrotarra Arraun Elkartea Traineruen egungo tenperatura neurtzeko azken aukera igandean izango da Pasaiako badian. Sanpedrotarra Arraun Elkarteak San Pedroko XVI. Test Estropada antolatu du. Ontziak osasunez nola dabiltzan ikusteko aukera dute zaleek eta entrenatzaileek, beharrezkoak izan daitezkeen sendagaiak lortu eta emate aldera. Sasoi aurreko estropada da, udaberria hasi berritan, uda urrun da oraindik. Baina aurretik egin diren test estropaden antzera, eta probak proba, ontzien joera eta plantillen osaketaren gainekoak ikusten has daiteke. Lehen estropada ofiziala ekainaren 1eko Gipuzkoako Txapelketa izango da, Orion. Ordura arte oraindik ere aste dezente falta dira. Igandean, hozberoa kalkulatzeaz gain, ondokoak nola dauden ikusiko du traineru bakoitzak.
11:00etan hasiko dira ateratzen traineruak San Pedroko Torrearen parean jarriko duten irteeratik. Erlojupekoa izango da prestaketa lehia, eta orotara 41 traineruk konfirmatu dute Pasaian izango direla, horietatik hamabi Oarso-Bidasokoak. Maila handiko estropada izango da. Adibidez, Eusko Labeleko hamabi traineruetatik 11 izango dira lehian (Galiziako Ares ez da izango), eta EuskoTreneko zortziak ere bertan izango dira. Horiez gainera, ETEko, KAE1 eta KAE2ko, nahiz Galiziako Ligako ontziak ere jasoko ditu badiak. Illunbeko emakume beteranoek, nahiz San Pedroko eta San Juango harrobiko traineruek ere eurena emango dute igandean.
Hiru multzotan banatu dituzte Sanpedrotarra Arraun Elkarteko antolatzaileek traineruak. Horien arabera egingo dituzte irteerak. Egin beharreko distantziak ere kategoriaren araberakoak izanen dira. Honakoak dira igandean San Pedroko XVI. Test Estropadan parte hartuko dutenak.
- Lehen txanda. 11:00etan aterako da lehen trainerua, eta besteak minutuero, jarraian dagoen ordenean: Trintxerpe-Illunbeko emakume beteranoak; San Pedro gazte Mailako neskak; San Juan Gazte Mailako mutilak; San Pedro Gazte Mailako mutilak. Horien segidan ETE Ligako traineruak: Hernani, San Juan, Kaiku eta Zarautz. Horiek eta gero EuskoTrenekoen txanda: Zumaia, Astillero, Hibaika, Hondarribia, Donostiarra, Orio, Arraun Lagunak eta Tolosaldea. Gero, Galiziako Ligako URME, eta KAE2ko San Juan B, Hibaika, Busturialdea eta Orio B.
- Bigarren txanda. 11:50an hasiko dira ateratzen traineruak, minutuero, jarraian dagoen ordenean: Castropol (Galiziako Ligan daude asturiarrak), eta KAE1ekoak ondoren: Hondarribia B, Pedreña, Zarautz, Lapurdi, Arkote Santurtzi, Zumaia, San Juan (Eusko Label Ligan dago), eta San Pedro.
- Hirugarren txanda. 12:30ean hasiko dira ateratzen traineruak minutuero, jarraian dagoen hurrenkeran. Denak Eusko Label Ligakoak dira: Kaiku, Cabo, Ondarroa, Isuntza, Getaria, Hondarribia, Orio, Donostiarra, Zierbena eta Bermeo.
