Bake epaile titular eta ordezko bila
Pasaiako Udalak bidea hasi du bake epaile titularra eta ordezkoak hautatzeko. Hilaren 27tik hasita, interesdunek 15 egun dituzte eskaerak aurkezteko.
Pasaiako Udalak bidea hasi du bake epaile titularra eta ordezkoak hautatzeko. Bake epaileak eta haien ordezkoak lau urterako izendatuko ditu dagokion justizia auzitegi nagusiko gobernu salak, eta kasuan kasuko udalak hautatutako pertsonak izendatuko dituzte. Udalak aukeraketa egingo du legezko baldintzak bete eta hala eskatzen duten pertsonen artean, udalkideen gehiengo osoaren aldeko botoekin. Eskatzailerik ez badago, osoko bilkurak askatasunez hautatuko duela adierazi du udalak.
Iragarkia hilaren 27an argitaratu zen Gipuzkoako Aldizkari Ofizialean. Ordutik, interesdunek 15 egun balioduneko epea izango dute hautagaitzak aurkezteko. Eskaerak udalaren sarrera erregistroan aurkeztu behar dira, horretarako ezarritako galdetegia betez. Udalak prozesuaren inguruko informazio osagarria argitaratu du udal webgunean.
Eskaerak ere hiritarren arretarako udal zerbitzuetan aurkez daitezke, astelehenetik ostiralera, 08:00etatik 14:00etara. Gune horiek Donibanen (Donibane kalea 19), Trintxerpen (Euskadi etorbidea z/g) eta Antxon (Hamarretxeta kalea 22-24) daude kokatuta.
