Lezoko udalekuetan izena emateko epea, zabalik
3-12 adin tarteko haurrentzako Udan Jostatzera udalekuak uztailaren 1etik 30era egingo dituzte. 200 plaza daude.
Sanferminak ere ospatzen dituzte Lezoko udalekuetan. Lezoko Udalak jakinarazi du jada izena eman daitekeela herriko udaleku irekietan, Udan Jostatzeran. Gaur (hilak 31, astelehena) zabaldu da izen emateko epea, eta apirilaren 11ra arte da zabalik. Udalak izen ematea Internet bidez egiteko aholkua eman die interesdunei. Baliatu esteka hau horretarako (informazio sakonagoa bertan lor daiteke). 200 plazakoa da eskaintza. Euskara eta Kultura aretoan ere (Donibane kalean) eman daiteke izena (08:30-13:30). Lezon erroldatuta edo herriko ikastetxeetan matrikulatuta dauden 3-12 adin tartekoentzat dira udaleku horiek.
Uztailaren 1etik 30ra arteko epean izango dira Udan Jostatzeraren saioak, astegunetan 09:30etik 13:30era. Lezo Herri Eskolan bilduko dira egun horietan. Horien prezio orokorra 85 eurokoa da; aurten ere, gainera, aurretiko haurtzaindegi zerbitzua eskainiko da, lanean diren gurasoei begirakoa, 08:30etik 09:30era. Zerbitzu hori baliatu nahi dutenek beste 55 euro ordaindu beharko dituzte (zerbitzua eskaintzeko gutxienez zortzi haurreko taldea osatu behar da). Edonola ere, familien izaeraren araberako hobariak eska ditzakete sendiek.
