Ongietorri asko eta agur batzuk Pasaia-Lezo Lizeoaren egunean
Lizeo Eguna izan zen atzo. Besteak beste, erretiratuko diren langileei eta ikasketa prozesua bukatuko dutenei aitortza egin zieten.
Goizeko ikuskizunaren uneetako bat.Pasaia-Lezo Lizeoa Pasaia-Lezo Lizeoaren Eguna izan zen atzokoa. Ikastolaren hezkuntza komunitatearen urteroko elkargunean ongietorri asko eta agur batzuk izan ziren. Ehunka izan ziren Donibanen ikastolak duen egoitza nagusiko ekitaldietara hurbildu zirenak. Ikasle, guraso, senitarteko edo ikasle ohi, denek eman zioten kolorea egunari.
Gazteenen dantza saioekin hasi zen eguna. Mailaz maila, koreografia landuekin gozatu zuten goiz atsegina. “Ongietorri” handi bat eskaini zieten ikuskizunekin han izan ziren guzti-guztiei. Beste ongietorri bat: 1989ko belaunaldikoei harrera egin zieten ekitaldia bitartean, urteroko ohitura baita ikastolan izan direnei aitortza egin, eta aldi berean, garai zaharrak biziberritzeko aukera ematea.
Agurren tartean, bi multzo. Batetik, Batxilergoko bigarren mailakoei, aurten hezkuntza zentroko ikasketa prozesua bukatu behar dutenei, oroigarriak eman zizkieten (2007ko belaunaldia da), ikastolatik haragoko bidea indarrez has dezaten. Agurren tartean ere, erretiroa hartuko duten bi langileri aitortza: Maite Etxeberria Almandozi eta Karmele Zabaleta Zabalari. Zuzendaritzako ordezkariek esker on hitzak izan zituzten haientzat dantza saioen ondoren egindako ekitaldian.
Bazkaria ere izan zen, jangelan. Txiki gelditu zen aretoa. Horren ondoren, bingo musikatuarekin, euskal kantak eta zortea harremandu zituzten Lizeo Egunarekin bat egin zutenek.
Jarraian, eguneko hainbat irudi, Pasaia-Lezo Lizeoak HITZAra bidalitakoak:
