Pasaitarrentzat test ona izan da, San Juanentzat batez ere
Gizonetan laugarren eta emakumeetan bosgarren izan dira San Juanen ontziak San Pedroko XVI. Test Estropadan. San Pedroko gizonak, hamaseigarren.
San Juanen emakumeen trainerua, eta San Pedroko gizonena atzo badian lehian.Jose A. Rodriguez / Facebook Atzo (igandea) jokatu zen San Pederoko XVI. Test Estropada badian, Sanpedrotarra Arraun Elkarteak antolatuta eta 40 traineruren presentziarekin. Horien artetik azkarrena Tolosaldea izan zen emakumeen kategoria nagusian, eta Orio gizonenean. Pasaitarren ikuspegitik, sanjuandarrek egindako lana nabarmentzekoa da: emakumeetan bosgarren izan zen Batelerak trainerua, eta gizonetan laugarren Erreka-ren lehen ontzia. Azken kategoria horretan hamaseigarren postuan sailkatu zen San Pedroko Libia, eta 21.enean San Juan B. Udako konpetizio ofizialak urruntxo dira oraindik, baina horrelako lehiek balio dute bakoitza non dagoen jakiteko, eta probak proba, landutako plantillak eta neguan egindako lana neurtzeko. Nola ez, izango da traineruren bat karta guztiak azaldu ez dituenak sasoi aurreko prestaketa estropadetan. Baina San Pedrokoak joera baten lehen trazak eman ditzake. Lehen lehia ofiziala ekainaren 1eko Gipuzkoako Txapelketa izango da, Orion.
Emakumeetan Tolosaldea garaile, 11.04 denborarekin. Haiengandik zazpi segundora Arraun Lagunak. Antza, azken sasoietan ia den-dena irabazi duen Donostiako traineruak banderen lehian aurkari hurbila izango du, aurrez aurrekoetan izango dute estuasunik. Alternantziaren aukera hor da. Orioren (11.17) eta Astilleroren (11.26) atzetik sailkatu zen San Juan (11.27) bosgarren izateko, atzean EuskoTrenen ariko diren Zumaia, Donostiarra, Hibaika eta Hondarribia utzita. Oso emaitza ona batelerena.
Gizonetan Oriok astindu zuen irabazlearen bandera (20.22), atzetik izan zituelarik Zierbena (20.36) eta Donostiarra (20.41) podiuma osatzeko. San Juan laugarren 20.46ko denborarekin. Udako betaurrekoak eta ontziak kokatzeko neurgailuak jarrita, Eusko Labeleko ohorezko txandan legoke Erreka. Atzetik, adibidez, Bermeo (bosgarren, 20.47) eta Hondarribia (zazpigarren, 21.04) erraldoiak utzi zituzten atzean arrosek. Oso emaitza esanguratsua, beraz. San Pedro hamaseigarren izan zen (21.35), eta San Juan Bk 21. denborarik onena egin zuen (21.58).
Ontzi pasaitar gehiago izan ziren lehian atzo badian. Trintxerpe-Illunbeko emakume beteranoek, San Pedroko Gazte Mailako neskek, eta San Juango nahiz San Pedroko Gazte Mailako mutilek ere egunaz arraunean gozatu zuten, onena ematen.
Jarraian, atzoko estropadetako sailkapen oso-osoak.
San Pedroko XVI. Test Estropada. Emakumeen, gazteen eta beteranoen sailkapenak.
San Pedroko XVI. Test Estropada. Gizonen sailkapenak.
Segidan, Pasaiako traineruen atzoko irudiak, Jose A. Rodriguezek egindakoak, eta HITZAk haren sare sozialetatik jasoak.
