Arantxa Lete Bergaretxe hil da
Irakaslea, Oiartzungo kultur eta gizarte mugimenduetan engaiatua, eta Killirikupe elkartearen sortzaileetakoa izan zen 1945ean jaiotako oiartzuarra.
Arantxa Lete Bergaretxe (Oiartzun, 1945-2025) hil zen atzo (apirilak 2, asteazkena). Lanbidez irakaslea, Oiartzungo kultur eta gizarte mugimenduetan sakon ibili zen lanean Elizalde auzoko Egiania etxean jaiotako emakumea. Haren herrigintzan eragiteko alorrak batez ere feminismoa eta abertzaletasunari lotutako adierazpideak izan ziren. Oiartzunen oso ezaguna, emakume ireki eta langilea izan zen, herriarekin eta herrigintzarekin engaiatua. Arrastoa utzi du Oiartzunen.
Familia abertzalean jaioa, txikitatik jaso zuen Euskal Herriarekiko maitasuna. Adierazpen desberdineko euskal kultura presente zegoen inguruan. Frankismoaren jazarpenak gogor astindu zuen haren familia.
1958an sortu zen Lartaun Jolas eta Kultur elkarteko kide izan zen, horren barruko mendi nahiz kultur taldeetan gogoz lan eginez. 1964-1965 ikasturtean hasi zen Orereta Ikastolan lanean, eta 42 urtez aritu zen bertan eskolak ematen. 1991-1995 agintaldian, berriz, Herri Batasunako zinegotzi izan zen Oiartzungo Udalean.
Herrigintzaren atalean Killirikupe emakumeak ahalduntzeko elkartearen sortzaileetakoa izan zen, hura udalean zen feminismotik herrian eragiteko eta emakumeak ahalduntzeko espazioa piztu zenean.
Xabier Lete anaia hil ondorengo aitortza eta omenaldi ekitaldietan Arantxa Lete izan zen familiaren ordezkari.
Arantxa Lete Bergaretxeren bizitzaz gehiago jakiteko, baliatu esteka hau.
