Albaola eta AZTI, eskutik helduta proiektu bateratuak sustatzeko
Bi erakundeek lankidetza hitzarmen bat sinatu dute euskal gizartearen artean itsas ondarearen gaineko interesa pizteko eta euskal ontzi tradizionalei buruzko ezagutza areagotzeko.
Albaola Itsas Kultur Faktoriak eta AZTI zentro teknologikoak lankidetza hitzarmen bat sinatu dute Euskal Herriko itsas kulturaren jasangarritasunaren aldeko egitasmoak elkarrekin sustatzeko. Erakundeek sinatutako aliantzak hiru urteko iraupena izango du hasiera batean, eta helburua da proiektu bateratuak sustatzea euskal gizartearen artean itsas ondarearen gaineko interesa pizteko eta euskal ontzi tradizionalei buruzko ezagutza areagotzeko. Albaola eta AZTI hezkuntza, gizarte eta kirol arloko hainbat elkarte eta erakunderekin arituko dira elkarlanean.
Sinatutako akordioak Albaolako itsas arkeologiako eta itsas kulturako I+G proiektuaren eta AZTIren itsas ikerketako ildoen arteko lankidetzarako oinarriak ezartzen dituela adierazi dute bi erakundeek. “Sinergia hori aukera handia da ontzigintza tradizionala, nabigazio historikoa, itsas baliabideen kudeaketa jasangarria eta klima aldaketara egokitzea bezalako gaiak lantzen dituzten proiektu berritzaileak garatzeko, baita erronka globaletan sakontzeko ere, hala nola korronte ozeanikoetan, itsas biodibertsitatean eta muturreko gertaerak arintzean”, nabarmendu du Rogelio Pozo AZTIko CEOak.
Albaolaren eta AZTIren arteko akordioari esker, XVI. mendeko San Juan baleontziaren erreplikaren etorkizunari lotutako proiektu zientifikoak bultzatu ahal izango direla zehaztu dute bi erakundeek. San Juan Albaolako eraikuntza lan “anbiziotsuena” dela baietsi du Xabier Agote Albaolako presidenteak, eta 2025ean bukatzea aurreikusi dute: “Kanadan 30 urtez azterketa zientifikoa egin eta 10 urtez arkeologia erreplika eraiki ondoren, gure ontzirik ezagunena da. Eraikuntza osatzen denean, ontziaren bidaiak plataforma zientifiko gisa erabiliko dira, AZTIrekin lankidetzan, Ipar Atlantikoko fenomeno kritikoak aztertzeko.
Horrez gain, lankidetza hitzarmenak Ozentziyo itsasontzia zaharberritzeko eta dinamizatzeko aukera bultzatuko duela adierazi dute. Ontzi hori zurezko azken euskal arrantzontzietako bat da, eta martxan dagoenean, helburu pedagogikoekin erabiliko da ikasleentzat, elkarteentzat edo interesdunentzat. “Sortu ginenetik, euskal itsas ondarearekiko interesa sustatzea izan da beti helburua. AZTIrekin lankidetzan aritzeak gure lan arkeologikoa ikerketa ozeanografikoarekin lotzea ahalbidetuko digu, euskal gizartearen historia ez ezik, egungo itsas erronketarako irtenbideak ere eramanez”, nabarmendu du Agotek.
Azkenik, bi erakundeek elkarrekin landuko duten beste ildoetako bat da Pasaiako badian itsas mugikortasuna deskarbonizatzea ahalbidetuko duten soluzio berriak garatzea. “Bi aldeek euskal itsas ondarea zaintzeko eta Pasaiako badiaren jasangarritasuna bermatzeko dugun konbentzimendu irmoarekin eta konpromisoarekin, akordio hau mugarri garrantzitsua ezarrita ditugun helburuak lortzeko”, esan du Pozok.
