Asteburuan, Lesoinuren eztanda
XXXIX. Lesoinuren lehen asteburu handia da honakoa. Bost jarduera izango dira Tomas Garbizu Musika Eskolan, Gezalan eta kalean.
Sutargi abesbatza Usansoloko Orfeoiarekin batera ariko da bihar Gezalan. Joan den larunbatean izan zen Lesoinu XXXIX. Aste Pedagogiko Musikalaren lehen ekitaldia. Berotze ariketa bat besterik ez zen izan Oxygen saxofoi laukoteak emandako kontzertua. Izan ere asteburu honetan tenperaturaren maila asko igoko du kultur zikloak, orotara bost ekitaldi izango direlako.
Bi lehenak gaur dira. Batetik, Ostomila Txotxongilo Taldeak Txotxongilo ikuskizuna taularatuko du Gezala Auditoriumean 17:15ean hasita, haurrentzako pentsatutako proposamenean. Bestetik, Aimhoa Pintosek Musikosophia hitzaldi-tailerra emango du bitan Tomas Garbizu Lezoko Udaleko Musika Eskolan, 17:00etan eta 18:30ean; musika kontzertuetan gehiago gozatzeko azalpenak eta irizpideak emango ditu Pintosek.
Bihar, ahotsen txanda. 19:30ean hasita, Usansoloko Orfeoiak (Bizkaia) eta herriko Sutargi abesbatzak emanaldi bateratua egingo dute Gezalan.
Etzirako (igandea) kaleko jarduerak antolatu dituzte Lesoinuren barruan. Hasteko, 11:00etan, herriko musika eskolako txistularien taldeak oraindik ere esna ez daudenei diana bidez adieraziko diete Lesoinu martxan dela. Ondoren, 13:00etan, Hallos saxofoi laukoteak kontzertua emango du herriaren erdi-erdian, Gurutze Santuaren plazan.
