Musika elektronikoak bere txokoa topatu du Donibanen
Xantixa eta Oarso Groove elkarteek antolatuta, Oarsoaldeko III. Elektronika Topaketa jasoko du Juanba Berasategi aretoak datorren larunbatean (hilaren 12an), 16:30etik aurrera.
Iazko jaialdiaren irudi bat, Juanba Berasategin.@jari.photox Xantixa eta Oarso Groove elkarteen ekimenez, musika elektronikoak Donibaneko Juanba Berasategi aretoa hartuko du datorren larunbatean (hilaren 12an), 16:30etik aurrera. Oarsoaldeko III. Elektronika Topaketa izenpean, musika elektronikoa protagonista izango da egun batez Pasaian, eta txoko bat eskainiko zaio Donibaneko aretoan. Aurtengoa musika elektronikoa ardatz duen jaialdiaren hirugarren ekitaldia izango da jada, bide bat egin duen seinale.
Xantixako eta Oarso Grooveko kideek urteak zeramatzaten Donibanen eta eskualdean musika elektronikoa sustatzen, eta beren zaletasunean pauso bat gehiago eman nahi izan zuten, musika estilo horren inguruko jaialdi bat sortuz. Festibalaren muina musika pintxada bada ere, egitaraua harago doala jakinarazi dute Manu Etxarri eta Marko Ferrer antolatzaileek, musika mota horren alderdi kulturalari ere erreparatzen baitiote. «Beti egin dugu musika elektronikoaren aldeko apustua, baina alderdi kulturalari ere garrantzia eman nahi izan diogu. Hortik dator jaialdia sortzeko ideia, alderdi kulturala balioan jartzeko», esan du Etxarrik. Jaialdiaren lehen ekitaldian, adibidez, musika elektronikoaren historiaren eta kulturaren inguruko hitzaldi bat antolatu zuten. Bigarrenean, aldiz, inguruko bi DJrekin elkarrizketa bat egin zuten, eta, ondoren, aukera eman zieten musika pintxatzeko. Aurtengo ediziorako kartel erakusketa bat ondu dute, jaialdiaren egunean ikusgai egongo dena, Juanba Berasategin.
Programazioari dagokionean, zortzi DJk girotuko dute Donibaneko gunea. Aretoko ateak 16:30ean irekiko dira, eta 17:00etan piztuko dituzte bafleak pintxadari ekiteko. Lehenik, Etxarri eta Ferrer, hau da, Mane Galinha eta Markinson DJak arituko dira, arratsaldea berotzen hasteko. «Guk geuk egingo dugu aretoa betetzeko prozesua, berotzen joateko», esan dute bi DJek. Haien ondoren, Gobus eta Drumfolder DJek dantzan jarriko dituzte Juanba Berasategin bildutakoak. Azkenik, Errenteria-Oreretako Nomaklimato Kolektiboko lau kideen pintxadaren txanda izango da: Anartzen, Juantxiren, Unai Bellamyren eta Alexen musikarekin itxiko da jaialdia. Elektronika topaketaren sarrera doakoa da, eta 01:00etan bukatuko da musika saioa.
Pagoa diskotekari omenaldia
Aurtengo jaialdiak Oiartzungo Pagoa diskotekaren jarduna errekonozitu, bistaratu eta balioan jarri nahi duela adierazi dute Etxarrik eta Ferrerrek, musika elektronikoaren bilakaeran izan duen inpaktua «handia» izan baita. Pagoari merezi duen garrantzia eman ez zaiola baietsi dute jaialdiaren antolatzaileek. Oiartzungo aretotik, baina, puntako DJak pasa direla nabarmendu dute Etxarrik eta Ferrerrek: «Pagoak erakusten du hemen maila handiko DJak izan direla. Nahiz eta hemengo mugimendua ez izan oso famatua, altxor horiek izan ditugu. Pagoak garai oso-oso onak izan ditu etortzen ziren artistengatik».
Pagoaren ibilbidea goratzeaz gain, atzetik dagoen lana azaleratu nahi izan dute aurten. Alde batetik, Nomaklimatoren bideari keinu egin nahi izan diote, haiek baitziren Pagoako erresidentzia eramaten zuten DJak eta Oiartzunen bildutakoak dantzan jartzen zituztenak. 20 urte daramatzate batera pintxatu gabe, eta denak batera egongo dira Donibanen. Bestalde, kartel erakusketa bat ondu dute. Sustatzaileak kartelak sortzen zituen diseinatzaile grafikoarekin jarri ziren harremanetan, eta 2000ko hamarkadaren hasierako hainbat kartel ikusi ahal izango dira datorren larunbatean. Kartel horiek salgai izango direla aurreratu dute antolatzaileek, nostalgikoentzat.
