Lehen mailakoak dira
Gipuzkoako Lehen Mailara igo da Munttarperen gizonen taldea. Larunbatean sufritzea tokatu, baina azkenean helburua lortu dute.
Munttarpeko jokalariak, larunbatean, ospakizun betean. Munttarpe Eskubaloi Klubaren gizonen taldeak Gipuzkoako Lehen Mailan jokatuko du 2025-2026 denboraldian. Larunbatean partida erabakiorra jokatu zuten Bekoerrotan Zumaiako Pulporen kontra, eta 27-28 galdu bazuten ere, zakura eraman zuten igoera. Ligako azken partida zen, final antzeko bat. Izan ere, sailkapen nagusian bi puntuko aldea zuten zumaiarrekiko lezoarrek, eta nahiz eta bi puntuak kanpokoek eraman, gol aldeagatik lortu dute Gipuzkoako Bigarren Mailako liga lider bukatu, eta zuzenean igotzeko eskubidea ematen zuen plaza bere egitea.
Munttarpeko neskak, pozarren, larunbatean.
Emozioz betetako arratsaldea izan zen larunbatekoa. Gogor borrokatu zuten lezoarrek partida irabazteko, baina azkenean ezin: uneren batean lau gol atzetik ere joan ziren. Hala ere, etxeko lanak aurretik eginak zituen Munttarpek, eta bi puntuko abantaila horregatik babes sarea zuen; gainera, gol alde partikularra (22-25 irabazi zuten joaneko partida lezoarrek Zumaian) eta orokorra ere aldeko zuten, beraz, lasai ez, baina konfiantzaz atera ziren kantxara. Zaleen babesa ere handia izan zen, horrek ere bultzatu zituen lezoarrak igoerara. Ospakizun handia egin zuten eskubaloi jokalariek kantxan bertan, aldageletan, eta herrian.
Gizonen taldearena, ordea, ez zen larunbateko poz iturri bakarra izan. Emakumeen taldea Federazio Garaikurra ligaxkako garaile izan da, liga horretako azken partidan kontrario zuzen zuen Donibane Eskubaloiari 26-21 irabazi ziolako. Emakumeek ere ederki asko ospatu zuten egindakoa.
