Bateletan, Gipuzkoako hiru txapelketa Pasaiara
Atzo jokatu zen Donibanen Gipuzkoako Batel Txapelketa. San Juanek neska promesetan eta mutil gazteetan lortu zuen urrea, eta San Pedrok mutil promesetan.
San Juango eta San Pedroko arraunlariak, atzo. Larunbateko sailkapen estropaden ondoren (Gipuzkoako Batel Ligako azken jardunaldia ere izan zen larunbatekoa), atzo (igandea) jokatu zen 2025eko Gipuzkoako Batel Txapelketa Donibanen, San Juan-Koxtapek antolatua. Jokoan izan ziren zazpi txapeletatik hiru Pasaian gelditu ziren: San Juanek bi irabazi zituen, eta San Pedrok bestea. Herriko harrobia indartsu dago.
Atzo goizeko lehen txapela San Juanen Promesa Mailako neskena izan zen. Ondoren, San Pedroko Promesa Mailako mutilek ere urrezko domina jarri zuten soinean (maila horretan San Juan laugarren izan zen). Hirugarrena San Juanen Gazte Mailako mutilentzat izan zen, San Pedro bigarren izan zelarik kategoria horretan.
Bestelako ohorezko postu asko lortu zituzten herriko batelek. Honakoak:
- Mutilen Haur Mailan Zarautz izan zen txapeldun, eta San Juanek laugarren postua eskuratu zuen.
- Nesken Gazte Mailan Tolosaldeak egin zuen denborarik onena, eta San Juan hirugarren izan zen.
- Gizonen Absolutu Mailan Zarautzentzat urrea, eta San Juan eta San Pedrorentzat zilarra eta brontzea hurrenez hurren.
Txapelketarako estropadez gain, Federaziokoak ere jokatu ziren. Atzoko sailkapen eta denbora guztiak ikusteko baliatu esteka hau.
Liga
Larunbatean, atzoko Gipuzkoako Txapelketarako sailkapen estropadak jokatu ziren, baina aldi berean lehia Gipuzkoako Batel Ligako hamabigarren eta azken lehia ere izan zen. Beraz, herrialdeko liga larunbatean itxi zen. Horretan, San Pedrok bi liga irabazi ditu, eta San Juanek bat.
Jokatutako hamabi jardunaldiak kontuan hartuta, honakoak izan dira Pasaiako batelek sailkapen nagusietan izan dituzten tokiak:
- Haur Maila, neskak: San Pedro hamabigarren izan da. Txapelduna: Mutriku A.
- Haur Maila, mutilak: San Juan hirugarrena izan da. Txapelduna: Zarautz A.
- Promesa Maila, neskak: San Juan A bigarrena izan da, San Pedro A zazpigarrena, San Juan B hamahirugarrena, San Pedro B hamalaugarrena eta Trintxerpe-Illunbe hamabosgarrena. Txapelduna: Tolosaldea A.
- Promesa Maila, mutilak: San Pedro A txapelduna izan da, San Juan hirugarrena, San Pedro B seigarrena, eta Trintxerpe-Illunbe zazpigarrena.
- Gazte Maila, neskak: San Juan A hirugarrena izan da, San Pedro A zazpigarrena eta San Pedro B bederatzigarrena. Txapelduna: Hibaika A,
- Gazte Maila, mutilak: San Juan B txapelduna izan da, San Pedro A bigarrena, San Juan A hirugarrena, San Juan C zazpigarrena, eta San Pedro B hamargarrena.
- Absolutuak, emakumeak: San Juan A bigarrena izan da. Txapelduna: Hibaika.
- Absolutuak, gizonak: San Pedro txapelduna izan da, eta San Juan A hirugarrena.
Ligako sailkapen osoak ikusteko baliatu esteka hau.
