Mendi eta itsaso artean, Euskaraldia lagun
Sasoiko zazpigarren irteera egin zuen Xoxolur Mendi Klubak igandean. Lezotik Donostiara Euskaraldiarekin joan ziren.
Zurriolan talde argazkia atera zuten.Xoxolur Sasoiko zazpigarren irteera egin zuten Xoxolur Mendi Klubeko kideek igandean. Lezotik San Pedro aldera joan, eta han Ulia mendiko bide gozoak hartu zituzten itsasoaren kresalaren eta eguzkiaren konpainiarekin Donostiaraino iristeko. Ausartenek urteko lehen bainua hartu zuten Zurriolako hondartzan. Atrebimendua izaten zutenetatik gehienak haurrak izan ziren.
Hartara, nahiz eta Euskaraldian parte hartzeko aukera ez izan, haur horiek arduratu ziren hiriburuan Euskaraldiaren pankarta hartu, eta horrekin argazkia ateratzeaz. Odol berokoak izaki, itsasoaren freskotasunak ez zien kalterik egin, eta gehienek 16 urte ez izan arren (Euskaraldian adin horretatik gorakoek parte har dezakete), bero-bero adierazi zuten euskaraz bizi nahi dutela. Adinekoek eredu horri eutsi, eta maiatzaren 15etik 25era euskararen erabilera sustatzeko egitasmo erraldoiaren leloarekin bat egin zuten. Xoxolurren oinarrien artean baitago familia giroan irteerak egitea, beti euskaraz.
Jarraian, igandeko txangoaren hainbat irudi, Xoxolurreko kideek HITZAra bidalitakoak.
