Auzoetako jaietan puntu moreak nahi ditu EAJk
Proposamena aurkeztu du alderdi jeltzaleak, "auzoak denentzat indarkeriarik gabeko eremu eta inguru seguru" izan daitezen jaietan.
EAJko Elixabete Murua eta Luis Mari Oiarbide artxiboko irudi batean. Auzoak “indarkeria, eraso, jazarpen eta beldurrik” gabeko espazio izan daitezen nahi du EAJk jaiak gerturatzen ari direla eta. Hori horrela, puntu moreak “funtsezko tresnatzat” jo ditu. “Zaurgarri senti daitezkeen edo ospakizunetan indarkeria egoerak jasaten dituzten pertsonei babes edo laguntza gune bat eskaintzeko”. Pertsona guztiek jaiez gozatzeko duten eskubidea “negoziaezina” dela ere esan du EAJk komunikabideetara helarazitako prentsa oharrean.
Puntu morea ez da berria udalerrian, madalenetan edota Atlantikaldia jaialdian ere ezarri ohi da. Orain auzoetara eramatea nahi dute jeltzaleek, “Agustinak, Alaberga, Beraun, Fanderia, Gabierrota, Gaztaño, Igantzi, Kaputxinoak, Pontika eta Zamalbidera zabaltzea proposatu dugu”.
Datozen asteetan hasiko da azuoetako jaien garaia, eta jeltzaleek, horietara jende asko bilduko dela nabarmendu dute.
Urtean zehar egiten diren ekitaldi handietan, halaber, kisoko morea ezartzea eskatu dute Iztietako kioskoaren kokalekuan.
