Gazteentzako etxebizitza komunitarioan, 11 plaza eskura
Izena emateko epea, maiatzaren 12ra arte izango da zabalik. Hainbat baldintza bete behar dituzte parte hartu nahi dutenek.
Etxebizitza komunitarioaren aurrean egin dute agerraldia Zorzanok eta del Amok gaur.Herri Bizia Errenteriako Udalak deialdi berri bat zabaldu du emantzipatu nahi duten gazteei begira. Udalerrian sei hilabetetik gora erroldatuta izan behar dute parte hartu ahal izateko deialdian, eta 18 eta 36 urte artean izan. Beste bi baldintza ere bete beharko dituzte gazteei begirako etxebizitza komunitarioan bizilekua izan nahi dutenek. Hala, ez dute jabetzan etxebizitzarik izan behar, eta 35.000 eurotik behera irabazi behar dute urtean.
Deialdiaren berri emateko agerraldia egin dute gaur goizean Aitor Zorzano Gazteria zinegotziak eta Eneko del Amo Hirigintza zinegotziak. Datuak eman dituzte. Hala, eremu tentsionatu izendapenaren testuinguruan egindako diagnostikoaren arabera, Errenteria-Oreretako egungo emantzipazio tasa %37,3koa da, “Araba, Bizkai eta Gipuzkoako batez bestekoaren gainetik egonda ere, lanean jarraitu behar dugu errealitate horri aurre egiteko, Donostiak metropoli inguruan sortzen duen presioaren ondorioz, gazte askok jotzen baitute Errenteriara”.
2019 urte hasieran jarri zuen martxan udalak etxebizitza komunitarioa, eta Del Amok eta Zorzanok nabarmen jarri dute, “proiektu aitzindaria” dela Gipuzkoan. 26 lagunentzako lekua du, eta amankomunak diren hainbat zerbitzu “cohousing filosofian oinarrituta”.
Maiatzaren 12ra arte zabalik izango da izena emateko epea, eta 11 plaza eskainiko ditu udalak. Etxebizitza bakoitzaren alokairuaren kostua diru sarreren araberakoa izango da eta progresibitatea aplikatuko dela azaldu dute udal ordezkariek.
Ez da udalerrian gazteen emantzipazioa bultzatzeko azken urteetan egindako proiektu bakarra, eta horren harira, gogorarazi dute 2021ean gazteentzako 51 zuzkidura etxe zabaldu zirela Arramendin.
Etxebizitza komunitarioko 11 plazetako bat eskatzeko eskaera orria bete behar dute interesdunek eta horrekin batera aurkeztu Espainiako nortasun agiria edota horren baliokidea. Telematikoki egin daiteke eskaera (klik hemen) edota presentzialki Zu! Arreta zerbitzuan udaletxean eta Aldakoenean. Halaber, Etxebizitza Komunitarioa arautzen duen ordenantza ere kontsulta daiteke (klik hemen), eta informazio gehiago posta elektronikora mezua bidalita, edota 943 44 96 06 telefono zenbakira deituta eskatu daiteke.
