Argitu da misterioa: hona Oiartzungo Euskaraldiko Hamaikakoa
Hamaika egunetan zehar oiartzuarrak adi-adi izan dituen jolas bat egin du Ttur-ttur Euskaltzaleon Bilguneak. Ostiralean egin zuten aurkezpena.
Euskararen erabilera aktibatzeko mugimendua da Euskaraldia, eta maiatzaren 15etik 25era egingo dute ariketa. Oiartzunen, beste herri batzuetan bezala, Euskaraldiko batzordea sortu dute, eta hasieran entitateekin lanean aritu baziren ere, Hamaikakoari begira aritu dira lanean azken asteetan.
Itsaso Aldai Ttur-tturreko kideak kontatu du hasiera batean hamaikakoa osatzen duten kide guztiak elkartu nahi zituztela, baina ezinezkoa egin zitzaiela denak egun eta une berean elkartzea. Beraz, erabaki zuten egun bakoitzean sare sozialen bidez pertsona bakoitzaren itzala argitaratzea “jokoa emateko”. “Jolasarekin uste baino saltsa gehiago sortu da, herritarrek esan izan digute lagunekin-eta aritu direla asmatu nahian nor den nor. Uste genuena baino jende gehiagok hartuk du parte”, jarraitu du Ttur-tturrekoak.
Silueta bakoitzaren ondoan protagonistaren izenaren zein lehen bi abizenen lehen letrak jarri dituzte, eta herritarrek nor zen asmatu behar zuten. Hamaika egun izan dituzte herritarrek horiek asmatzeko, baina bat asmatzearekin nahikoa zen zozketan parte hartzeko.
Martxoaren 30ean hasi ziren jolasarekin, eta ostiralean (hilak 11) argitaratu zuten azken itzala. Gainera, egun horretan bertan egin zuten herrian aurkezpen ekitaldia. Lehiakideen arteko zozketa ere ostiralean egin zuten, Oiartzun Irratian, eta Aldai pozik agertu da parte hartzearekin, orotara 96 pertsonak hartu baitute parte. Maddi Iradi Belokik irabazi zuen Amaxkar tabernako bazkaria.
Ostiralean egin zuten aurkezpena, eta hura izan da publikoki egin duten lehen ekintza. Hala ere, Aldaik aurreratu du, besteak beste, triki poteoa, jolas komunitarioak eta kantu poteoa egingo dituztela.
Hikari bultzada eman nahian
Hamaikakoaren aurkezpena egiteaz gain, Kattalin Arabolaza Palomo, Egiar Otegi Torres eta Peru Alijostes Irastorza aritu ziren bertsotan, eta oroigarriak ere banatu zituzten. Arratsaldea zapore gozoarekin amaitzeko txokolatea banatu zuten bizilagunen artean.
Oiartzunen euskaraz mintzo badira ere, antolatzaileak nabarmendu du “azken boladako joerak ez direla gure aldekoak”. Hala ere, “euskaraz bizi den herria izanik”, hikari eman nahi diote garrantzia “beste erronka bat gehitze aldera”. Batez ere hika gazteen artean erabiltzea da bilatzen dutena.
Jarraian, aurkezpeneko bideotxo bat:
- Ane Garmendia Irastorza
- Janusz Borkowski
- Iraia Etxebeste Madariaga
- Karlos Ibarguren Olalde
- Virna Zuñiga Carrillo
- Joseba Olaziregi Zubiri
- Ane Asensio Telletxea
- Beñat Felipe Lekuona
- Alaia Martin Etxebeste
- Gotzon Reteegi Rekalde
- Feli Valenciano Tamayo
