Bide onetik doa Errenteria 2040 prozesua
Jarraipen handia izan du Errenteria 2040 prozesuaren diagnostikoak. Orotara, ehundik gora herritarrek hartu dute parte antolatutako saio irekietan.
Lansaioetako bat. Jarraipen handia izan du Errenteria 2040 prozesuaren diagnostikoak. Orotara, ehundik gora herritarrek hartu dute parte antolatutako saio irekietan. Diagnostikoaren fase honetan, pertsonen ongizatea, komunitate izaera, hiriaren antolaketa, eta udalaren eta herritarren arteko harremanak aztertu dituzte nagusiki. Hamabost urte barruko Errenteria–Orereta irudikatzea, eta horretara heltzeko plana osatzea ditu helburu Errenteria 2040 prozesuak.
Orain arte egindako lansaioetan herriaren indarguneak eta hobetzeko aukerak izan dituzte ardatz.
Informazioa eta ekarpenak jasotzen jarraituko du udalak datozen asteetan.
Azterketa sakonago baten esperoan, prozesuaren aurrerapen gisa hainbat ondorio nabarmendu ditu udalak. Hala, indargune gisa, herritarrek Errenteria-Oreretarekiko duten atxikimendua, eragileen izaera aktiboa, azken urteetan eraikitako igogailu sarea, edota udalak eragileen proposamenak jaso eta haiekn hitz egiteko erakutsitako jarrera irekia aipatu dituzte lansaioetan aritutakoek.
Hobetzekoak ere izan dituzte hizpide, eta horien aurrerapena ere egin du udalak. Zaku horretan, herritarren parte hartzea eta zibismoa, auzoetako deszentralizazioa, etxebizitzarekin eta osasunarekin loturiko gaiak, eta zenbait udal baliabide gehiago ezagutzeko ekintzak sartu dituzte momentuz.
Lansaioetan jasotako ekarpenak eta horien ondorioz sortutako dokumentuak ikusgai izango dira datozen asteetan (klik hemen). Gune horretan prozesuaren agenda eta bestelako edukiak kontsultatu ahalko dira, halaber. Urtebete iraungo duen idazketa prozesuak lau fase izango ditu. Lehenengo fasean prozesuaren prestaketa lanak, eta aurreko planaren balantzea egin dituzte. Gaur egungo egoeraren diagnostikoa eta aurrera begirako erronken identifikazioa egitea izango da bigarren fasearen helburua. Horren parte da eragile eta herritarrekin batera egin berri dutena.
Hirugarren fasea, udazkenean egingo dute. Orain atzemandako erronkei erantzuteko proposamenak egiteko tartea izango da. Azkenik, laugarren eta azken fasean Errenteria 20240 prozesuaren ebaluazioa eta horren emaitzak neurtzeko adierazleak osatuko dituzte.
