Udalekuetako izen emateak maiatzean egin behar dira
Udaleku irekietako matrikulazioak maiatzaren 5etik 16ra bitartean egin behar dira. Aurten 360 plaza eskainiko dira, iaz baino 40 gehiago.
Pasaiako Udalak prest ditu jada udako udaleku irekiak. Ekintza horiek Pasaian erroldatuta dauden edo udalerrian ikasten duten eta 2015etik 2021era bitartean jaio diren haurrei begirakoak dira (Haur Hezkuntzako 3. mailatik Lehen Hezkuntzako 4. mailara, biak barne).
Aurtengo udalekuak uztailaren 1etik 30era bitartean izango dira, astelehenetik ostiralera, 09:30etik 13:00etara. Uztailaren 25ean zerbitzurik egongo ez dela aurreratu du udalak, jai eguna baita. Taldeak 10 eta 12 haur bitartekoak izango dira, eta bakoitzak begirale bana izango du. Udalekuetan askotariko jarduerak egingo dituzte bertaratzen diren haurrek: tailerrak, jolasak, eskulanak, txangoak edota irteerak igerilekura eta hondartzara.
Iaz eskaera kopurua handia izan zela jakinarazi du Julen Rodriguez Haur, Nerabe eta Gazteen Sustapen Saileko zinegotziak. Hori dela eta, aurtengo udalekuei begira, udal gobernuak plaza kopurua handitzea erabaki duela baietsi du Rodriguezek. Aurten 360 plaza eskainiko dira, iaz baino 40 gehiago, “ahalik eta haur gehienek udalekuetan parte hartu ahal izan dezaten”.
Matrikulazio kanpaina maiatzaren 5etik 16ra bitartean izango da, eta plaza kopurua gainditzen bada, zozketa egingo dela adierazi du udalak. Zozketa horretan lehentasuna izango dute udaleku irekietan plaza duten anai-arrebak dituzten haurrek eta aurreko urtean udaleku irekietan parte hartu zutenek. “Udaleku irekiak herriko familien zaintza eta kontziliazio beharrei erantzuteko tresna garrantzitsua dira, eta horregatik ari gara urtez urte eskaintza hobetzen. Aurten ordutegiak moldatu edota eskaintza osatzeko zaintza aukera berriak eskaini ahal izatea aztertzeari ekin diogu, familien beharrei ahalik eta hobekien egokitu ahal izateko”, nabarmendu du Rodriguezek.
Matrikula 79,50 eurokoa da, eta ordainketa egiteko datuak eta xehetasunak udal webgunean kontsulatu daitezkeela adierazi du udalak. Horrez gain, familia errentaren arabera hobariak eskainiko direla aurreratu dute. Izena ematerakoan, matrikula orriarekin batera ordainagiria eta haurraren osasun txartelaren kopia aurkeztu behar dira. Haur Hezkuntzako umeei dagokienean, nortasun agiriaren edo familia liburuaren kopia aurkeztu behar dute. Izen emateak udalaren webgunean edo HAZeko bulegoetan egin behar dira. Bulegoak 08:00etatik 14:00etara daude erabilgarri.
