LABek Lilitegiaren itxiera salatu du
Pasaiako Udal Haurreskolak zerbitzua etengo du datorren ikasturtetik aurrera. LABek adierazi du erabakia "guztiz okerra" dela eta udalari eskatu dio hartutako erabakian atzera egin dezan.
Pasaiako Udal Haurreskolaren aferak hautsak harrotu ditu Pasaian. Hainbatek salatu dute Lilitegiaren itxiera, eta LAB sindikatuak ere itxiera horren aurkako iritzia plazaratu du. “Pasaiako Udalak udal haurreskola zerbitzua bertan behera uzteko hartu duen erabakia okerra da”, adierazi du LABek. Sindikatuak gogorarazi du haurreskola zerbitzua lizitazio baten bitartez bertako ikastolak ematen badu ere, udal zerbitzu publiko bat dela, eta hemendik aurrera Pasaiako herritarrek zerbitzu hori ez dutela udalaren bidez jasoko.
Udalak hartutako erabakia “guztiz okerra” dela salatu du LABek, udalak eskaintzen dituen zerbitzu publikoak murrizten direlako. Hori dela eta, sindikatuak dei egin dio udalari “erabakian atzera egin dezan”.
LABen ustez, udal eskumena den eta udaletik bermatzen den zerbitzu bat “ezin da bertan behera utzi, horrek sortzen duen kaltearekin”. Sindikatuaren aburuz, 0-3 zikloa udal eskaintza publiko bateratuaren bidez eskaini behar da, eta uste dute tresnak badaudela horretarako: “Adibidez, orain arte zerbitzu hori kanporatuta ematen egon diren langileak udaleko langileak bilakatuz, udala eta ikastolaren artean titularitatea partekatuz, udala haurreskolaren titularitatearen jabegoaren parte izanik eta honen kontrol publikoa bermatuz, edo Lilitegia haurreskola Pasaiako Karmengo Ama haurreskola bezalaxe, Haurreskolak Partzuergoan integratuz, LABek lan hitzarmenean jaso zuen bezala langileen subrogazioa bermatuz, hau da, orain zerbitzua ematen ari diren langileak partzuergoko langile bilakatuz”.
Gauzak horrela, LABek 0-3 ziklorako eskaintza bateratu berria proposatu eta borrokatuko duela adierazi du, Haurreskolak Partzuergoa ardatz izango duena, “eskaintza publiko bateratuan beste udal haurreskola publikoak edota titularitate partekatua defendatuko dituen moduan”.
Pasaiako Udalaren erabakia LABek eraiki nahi duen Euskal Eskola Publiko Komunitarioaren kontrako norabidean doala baietsi du sindikatuak, eta “sare publiko berri bakar eta deszentralizatua eraikitzen hasteko aukera galdua” dela gaineratu du.
