Trintxerpeko Igeldo kalea berrurbanizatzen hasi dira
Igeldo kaleko jarduketak auzo osoaren birgaitze integraleko planaren barruan kokatuta daude, eta lanak 21 astetan gauzatzea aurreikusi du udalak.
Pasaiako Udalak Trintxerpeko Andonaegi auzoko Igeldo kaleko berrurbanizazio lanak hasi ditu. Jarduketa horiek auzo osoaren birgaitze integraleko planaren barruan kokatuta daude, eta lanak 21 astetan gauzatzea aurreikusi du udalak.
Igeldo kalearen berrurbanizazioa Andonaegiko eraldaketa sakonaren barruan dagoela adierazi du udalak, energia eraginkortasuna, irisgarritasuna eta bizi kalitatea hobetzea helburu duen plan integralaren baitan. Proiektua Europako Batasuneko NextGenerationEU funtsen bidez finantzatutako Berreskuratze, Eraldatze eta Erresilientzia Planaren zati da. Igeldo kaleko jarduketek 1.086.768,22 euroko aurrekontua du, BEZa barne, eta horietattik 466.279,15 euro NextGeneration funtsen bidez finantzatuko dira.
Honako lanak egingo ditu udalak Igeldo kalean: espaloiak zabalduko dira eta bideak irisgarri eta erosoagoak izan daitezen, egokitu egingo dira, urbanizazio kotak atarien kotekin bat egin dezaten; argiztapen berria ezarriko da; saneamendu sarea berrituko da; elektrizitate eta telefoniako kableak lurperatuko dira; berdeguneak sortuko dira eta zuhaitzak landatuko dira; eta egitura berriak eraikiko dira, besteak beste, euste hormak.
Igeldo kaleko berrurbanizazioa Andonaegiko birgaitze integralaren fase bat dela berretsi du udalak, non 19 ataritan banatutako 190 etxebizitza zaharberritzen ari diren. Plan integral horrek hiru hanka dituela jakinarazi du udal erakundeak: eraikinen birgaitze integrala (irisgarritasuna eta energia eraginkortasuna), urbanizazioa eta ekipamendu publikoa. Aldaketa horiek guztiak faseka egingo direla aurreratu du udalak. Lehen urratsak eraikinak zaharberritzea eta Igeldo kalea urbanizatzea izango dira.
Jarduketetan parte hartzen duten 190 etxebizitzetatik 160tan inguratzailearen birgaitze energetikoa egingo da eta irisgarritasuna hobetzeko, eraikinen barruan igogailuak jarri eta atarietan lanak egingo dira, bide publikotik irisgarritasun unibertsala bermatzeko. Gainerako 30 etxebizitzetan, aldiz, irisgarritasun unibertsala da bermatuko den aldagai bakarra, horiek energia eraginkortasunaren baldintzak jada betetzen baitituzte, fatxadetan obrak eginak dituztelako.
Kaleak berrurbanizatzeko planak oinezkoentzako eta egoteko eremuak eta zuhaiztien berritzea lehenesten dituela, eta hiri altzariak hobetzea eta azpiegiturak berritzea dakartzala nabarmendu du udalak. Bestalde, hegoaldera begira dauden egonleku berriak sortzeko eta kaleen arteko komunikazio bertikalak hobetzeko balioko duela gaineratu du udal erakundeak. Lehentasuna oinezkoentzako guneek eta irisgarritasunak izango dutela baietsi du udalak.
