Madalenetako gazte guneko programazioa erabakitzeko prozesua bihar abiatuko dute
Uztailaren 24an Gernika plazan izango den gazte guneko egitaraua 14 eta 17 urte arteko gazteek aukeratuko dute aurten ere.
Holi txupinazoa Gernika plazan artxiboko irudi batean. Madalenetako gazte guneko programazioa erabakitzeko prozesua bihar abiatuko du udalak, eta horrenbestez, deia egin die 14 eta 17 urte arteko gazteei uztailaren 24ko egitaraua ontzeko. Horretarako, instagram bidez botoak jasotzeko prozesua jarriko du martxan bihar (klik hemen), hilak 29, eta gazteek bertan bozkatu beharko dituzte proposamenak euren gustuen arabera. Lekuona Fabrikan ere utzi ahalko dira botoak eta proposamenak.
Hilaren 29 eta 30ean, bihar eta etzi hiru diziplina proposatuko dituzte: musika, kirola eta tailerrak. Halaber, horietatik kanpoko proposamenak egiteko aukera ere izango da.
Maiatzaren 5ean emaitzaren berri emango du udalak, eta horien arabera, proposamen zehatzagoak egingo ditu. Horietatik abiatuta, berriro jarriko du udalak martxan inkesta, behin betiko egitaraua osatzeko. Udalak parte hartzera deitu ditu gazteak, “ahalik eta gazte gehienengana heldu nahi dugu, parte hartze ahalik eta zabalena bermatu ahal izateko”.
