2025eko Xanistebanetako kartel lehiaketa martxan da
Maiatzaren 30a izango da lanak aurkezteko azken eguna, eta aurkeztutako lanen artean Jai Batzordeak aukeratuko ditu saridunak.
Oiartzungo Udaleko Kultura Batzordeak jakitera eman duenez, dagoeneko jarri dute martxan Xanistebanetako kartel lehiaketa, eta, bertan, herriko festa nagusiak iragartzeko kartel onena hautatuko dute. Iazko edizioan 45 proposamen jaso zituztela azaldu dute udaletik, eta ondorioz, “lan zaila” izan zuela Jai Batzordeak irabazlea aukeratzeko orduan.
Lehiaketan edonork hark lezake parte, eta nahi beste lan aurkezteko aukera du pertsona orok. Era berean, teknika librea izango da, baina bi baldintza bete behar dira: Xanistebanak 2025 leloa agertzea eta kartela 70x50cm-koa izatea. Kartelak izenik gabe aurkeztu behar dira, eta kartazal itxi bat entregatu beharko da egilearen datuarekin.
Oiartzungo Udalean aurkeztu beharko dira proposamenak, eta horretarako azken eguna maiatzaren 30a izango da. Herritarrek aurkezten dituzten lanen artean Oiartzungo Jai Batzordeak aukeratuko du festak iragarriko dituen kartela zein izango den eta beste sariak ere zeinentzat izango diren.
Sariak
Orotara, bost lan sarituko dituzte.
- Irabazleak 600 euro jasoko ditu.
- Lehen oiartzuarrak 300 euroko akzesita lortuko du. Irabazlea oiartzuarra bada, saria bigarren oiartzuarrari emango zaio.
- Saririk jasotzen ez duten bi lan original onenei 50 euroko laguntza eskainiko zaie.
- Haur eta gaztetxoen artean, 100TZE Sormen Espazioko urtebeteko doako matrikula zozketatuko da.
