Altza eta Galtzaraborda arteko lurpeko saihesbidea, azken fasean
Altza eta Antxo lotzen dituen tunelaren zatia ireki dute gaur. Horrez gain, Ibaiondo plaza berreskuratuko da gaur arratsaldean.
Langileak, ordezkari politikoak eta ETSkoak, tunela erabat zulatu ondoren topa egiten.Izaro Perez Loperena Euskal Trenbide Sareak (ETS) gaur goizean egin du Galtzaraborda eta Antxo lotuko dituen tuneleko bigarren kalearen edo bi fronteen bat egitea. Horrekin batera, bukatu dira Altza eta Galtzaraborda artean lurpean dauden saihesbidearen lineako tunel osoa hondeatzeko lanak. Jarduketa horiek egin bitartean, kaltetuta geratu den 3.000 metro koadroko Antxoko Ibaiondoko plaza gaur arratsaldean irekiko da.
Aurkezpenean Susana Garcia Mugikortasun Jasangarriaren sailburua, Miguel Angel Paez sailburuordea eta Antonio Lopez ETSko zuzendari nagusia izan dira. Galtzaraborda eta Antxo bereizten zituen tunelaren harria eta horma bota diren momentuaren lekuko izan dira. Obra hori Antxoko lurpeko geltokitik metro gutxira gertatu da, Molinao parean.
Langileek irekitako zuloa gurutzatu dute, eta Antxoko aldean zain zirenak agurtu ahal izan dituzte. Gaur emandako urratsa obra izaten ari den “aurrerapenaren sinbolo” dela adierazi du Garciak: “Funtsezko esku hartzea da Gipuzkoako trenbide mugikortasuna iraultzeko gauzatzen ari garen jarduketen sarean”.
Mugikortasun Jasangarriaren sailburuak bertatik-bertara ikusi ahal izan du Pasaian etorkizunean egongo den geltokiko lanen egoera. Hormigoi armatuzko egiturak, nasen egitura, larrialdietako irteeraren egitura eta sarbidearen eta atariaren egiturak egiten ari dira orain.
Antxoko lurpeko geltoki berria Gure Zumardia kalearen ondoko plazaren azpian dago. Sarbidea Eskalantegi kalean egongo da. Bertan ere igogailua egongo da, elizaren ondoan. Larrialdietako irteera, aldiz, Hamarretxeta kalearen inguruan egongo da. Geltokiko nasak alboetan izango dira, baina eskailerek atari bakar batera emango dute, eta handik irtengo da kalera. Bi nasak ere igogailu baten bidez egongo dira lotuta atariarekin.
Altza eta Galtzaraborda arteko bi kilometroko tunela ia bukatuta dago, Galtzarabordako noranzkoan. Altza-Pasaia tartean, aldiz, erabat hondeatuta dago duela hilabete batzuetatik, eta masa hormigoizko estalduran eta kanalizazioen dadoetan ari dira lanean.
Sailburuak Ibaiondo plaza gaur arratsaldean irekiko dela iragarri du. “Ekainean, behin-behineko konfigurazioarekin izan arren, plaza libre utzi genuen. Herriarentzat aisialdirako beste espazio bat berreskuratuko dugu, behin betiko. Horrek guztiak adierazten digu obrak bide onetik doazela, eta datorren urtean zehar azpiegitura berriaz bere osotasunean gozatu ahal izango dugula”, esan du.
Horrez gain, Garciak baietsi du trenbide bikoitzeko korridore jarraitua izango dela, “topoak edukiera eta maiztasun handiagoak izan ditzan”. “Jada ez da beharrezkoa izango ordutegiak begiratzea automobila edo Euskotren aukeratzeko, trena beti izango baita aukerarik azkarrena eta erosoena, baita jasangarriena ere”, adierazi du.
Hiri berroneratzea
Trenbidea integratzeko obra horrek herriari ekarriko dion hirigintza arloko berroneratzea nabarmendu du sailburuak: “Zubibidearen hurrengo desagerpenak hesi fisiko bat hautsiko du, eta pasaitarrek erabiltzeko eta gozatzeko espazio bat berreskuratzea ahalbidetuko du”. Martxoan, ETSk lizitaziora atera zuen Antxoko topoaren zubibidea eraisteko eraikuntza proiektuaren idazketa.
Halaber, trenbide administratzaileak martxoan lizitaziora atera zuen trenbidea Galtzaraborda eremuan integratzeko eraikuntza proiektuaren idazketa, trenbidearen estaltzea beregain hartzeko, eta trenak eremu horretan duen inpaktu bisual eta akustikoa ahalik eta gehien murrizteko.
Jarraian, gaurko bisitaren hainbat irudi eta bideoa.
