Askatasun sindikala eta adierazpen askatasuna urratzea egotzi dio LABek PPko zinegotziari
'Patronala esplotatzailea. Langileen alde, gutxieneko soldata eta pentsioak hemen erabaki' leloa zuten pankartak kentzeko agindu zion PPko zinegotziak udaltzainburuari, eta azken horrek kale garbiketa zerbitzuari helarazi zion agindua. "Eraso larria" dela salatu du LABek.
Pankartetako baten argazkia.LAB sindikatua Maiatzaren Lehenaren harira LAB sindikatuak jarritako pankartak kentzeko agindu ziola udaltzainburuari PP alderdiko zinegotzi Antonio Vicente Zubikoak salatu du sindikatu abertzaleak. Iraingarriak zirelakoan eman omen zuen agindua. Udaltzainburuak, agindua kale garbiketa zerbitzuari helarazi, eta azkenean, pankartak kendu egin zituen. Pankartaren leloa hitzez hitz, honakoa: Patronala esplotatzailea. Langileen alde, gutxieneko soldata eta pentsioak hemen erabaki.
PPkoaren jarrera askatasun sindikalaren eta adierazpen askatasunaren aurkako eraso laritzat jo du LABek, eta gogor salatu du, pankartetan erabilitako leloa guztiz justifikatuta dagoela babestuta: “Aurtengo Maiatzaren lehena gutxieneko soldataren zein pentsioen gaiak ezaugarritu du, eta Confebask eta CEN Patronala haien aurka izaten ari diren jarrera salatzeko baliatu dugu”.
Patronalari ildo “antisoziala” egotzi dio LAB sindikatuak eta horren adibide jarri du 23 hitzarmen sektorial berritzeari uko egin diola, pribilegio fiskalei eusten diela, industrian diru publikoa poltsikoratzen jarraitzen duela edota gutxieneko soldata propio adosteko negoziazioari iskin egin diola. Arrazoiak sobera dituztela hortaz patronalari jarrera “esplotatzailea” egozteko erantsi du sindikatu abertzaleak, “egoera honen aurrean langileon eskubidea da antolatzea, mobilizatzea, eta patronala seinalatzea. Baina nonbait, PPko zinegotzia ez da iritzi berekoa”.
Pankartak kentzeko aginduaren atzean VOXek Errenteria-Oreretara egindako bisitaren harira adierazi zuen oposizioak kostu politikoa eragin izana dagoela uste du LABek, “bere jarrera antisindikala markatu eta eskuinarekin lerratzeko urrats gisa egin duela ziur gaude”.
Bukatzeko, prekarietateari aurre egiteko borrokan jarraitzeko konpromisoa adierazi du sindikatuak, “askatasun sindikalaren eta adierazpen askatasunaren alde ere tinko eginez”.
