Lezoko Antzerki Testu Laburren III. Lehiaketa, martxan
Gaur ireki da Lezoko Udalak eta Hika Teatroa konpainiak sustatzen duten lehiaketan parte hartzeko epea, irailaren 10era arte irekia egongo dena.
Lezoko Udalak eta Hika Teatroa konpainiak Lezoko Antzerki Testu Laburren III. Lehiaketa aurkeztu dute gaur goizean Kultur Aretoan. Bertan izan dira Aitzol Saizar Kultur zinegotzia, Xanti Val Kultur teknikaria eta Agurtzane Intxaurraga Hika Teatroko zuzendaria.
Lehen bi ekitaldien arrakasta ikusita, aurten ere Lezoko Antzerki Testu Laburren Lehiaketa ondu dute udalak eta Hikak, hirugarrenez. Saizarrek jakinarazi du antzerki testu laburrak ardatz dituen egitasmoa Lezo Eszena programaren barruan kokatua dagoela. Programa horrek duen helburu nagusietako bat da gazteak kulturara eta arte eszenikoetara gerturatzea. Udalarentzat, Lezo Eszena ezinbesteko egitasmoa dela adierazi du udal hautetsiak, hiru zutabe baititu: euskara, kultura eta gazteria. Dramaturgian gazteen presentzia bermatzea ezinbestekoa da udalarentzat, gazteak antzerkira gerturatzeko eta kulturan ere beren lekua topatzeko. Gaur aurkeztu duten lehiaketak irizpide horiek hartzen ditu kontuan. Testuak, hortaz, euskaraz idatzi beharko dira.
Gaur (ostirala) ireki da antzerki testu laburrak bidaltzeko epea, irailaren 10eko 14:00ak arte irekia egongo dena. Irailaren 19an iragarriko dira sei finalisten izenak, eta sei testu finalisten irakurketa dramatizatuen partida urriaren 4an izango dela aurreratu du Intxaurragak. Ekitaldi hori Gezalan izango da. Intxaurragak adierazi du finalistak hiruna gizon eta emakume izango direla, eta horietako bik 35 urte baino gutxiago izan beharko dituztela. Epaimahaiak erabakitako finalisten irabazlea publikoak erabakiko du, eta 1.200 euro poltsikoratuko ditu.
Valek gogorarazi du udalaren helburua dela publikoak sustatzea, eta zenbateko hori %40an hazi da Lezon. Antolatzen dituzten emanaldi guztietan aretoak goraino betetzen direla esan du Kultura teknikariak. Udalak egindako apustua “%100ean” betetzen ari dela nabarmendu du Valek, eta hasieran finkatu zituzten helburuak bete dituztenez, gauza gehiago egitera ausartu direla jakinarazi du.
Egitaraua
Lezoko Antzerki Testu Laburren III. Lehiaketa Lezo Eszena programaren barruko ekitaldi bat da, eta Valek zehaztu du aurten egitasmo berri mordoa txertatu dituztela programa horren egitarauan. Aurten dramaturgiari lotutako formakuntza atala ireki dute. Atal berri horren baitan, Xabi Paia eta Jokin Oregi aurreko ekitaldietako irabazleak ikasleekin bilduko dira idazketa dramatikoa bultzatzeko. Martxoan, Paia Pasaia-Lezo Lizeoko Batxilergoko ikasleekin izan zen. Oregi, aldiz, ekainaren 14an eta 21ean Lezoko Kultur Aretoan izango da. Valek aurreratu du Oregiren tailerra irekia izango dela, eta idazteko grina eta zaletasuna duen orori begirakoa dela.
Horrez gain, dantza ikuskizunetan ikusle gazte gutxi zegoela antzeman zuen udalak, eta, hori dela eta, Ikusle Gazte Berria programa abiatu dute aurten. Intxaurragak nabarmendu du martxoaren 30ean izan zela programa horren barruko lehen saioa. Bigarrena hilaren 18an izango da, eta Kamikaz Kolektiboak Renata ikuskizuna antzeztuko du.
Orotara, zazpi dira Lezo Eszenaren barruan dauden kultur jarduerak. Azkenik, Txalostean izeneko solasaldiak bidea egiten ari direla zehaztu dute gaurko agerraldian. Urteko lehen lau hilabeteetan guztira 11 solasaldi egin direla baietsi dute, dantza eta antzerki ikuskizunen artean.
Paiaren eta Oregiren testuekin, liburuak osatu dituzte Lezon, eta Saizarrek aurkeztu egin ditu gaur. Lehen udaleko webgunean zeuden irakurgai; orain, baina, formatu fisikoan argitaratu dituzte. Liburu horiek Lezoko Udal Liburutegian eta Kultur Etxean eskuratu daitezke.
