Haroko erailketa matxista gogor salatu dute
Aurtengo Euskal Herriko hirugarren erailketa matxista salatzeko hamarnaka lagun elkartu ziren atzo, Oiartzungo Feministen Asanbladaren elkarretaratzean. Indarkeria matxistari aurre egiteko "autodefentsarako" eta "feministak batzeko" deia luzatu zuten.
Urtea “nazkatuta, nekatuta eta haserre” hasi dute Oiartzungo feministek. Urtarrilean gizon bat ama hiltzeagatik atxilotua izan, eta hilabete barru Irungo emakume baten erailketa matxistaren berri izan ondoren, apirilaren 25ean gizon batek Haron hildako emakumea Gasteizkoa zela jakinarazi du Gasteizko Udalak. Hori salatzeko, elkarretaratzea egin zuen atzo, hilaren 9an, Oiartzungo Feministen Asanbladak, 19:00etan Oiartzungo plazan.
Labankadaz hil zuen bikotekideak 36 urteko emakume gasteiztarra. 2025eko hirugarren erailketa matxista da, eta, 2003tik, 127.a. Herriko plazatik “babes eta elkartasun” osoa helarazi zieten biktimaren senide, lagun eta gertukoei.
“Sistema heteropatriarkal, kapitalista, arrazista eta kolonialak egituraz sostengatzen du indarkeria matxista, eta horren azken ondorio lazgarri eta ikusgarriena erailketa matxista dela” azpimarratu zuten feministek. Baina, jakin badakite indarkeria matxistak beste forma batzuk ere badituela, eta “emakumeek* bizitzako alor guztietan jasaten dutela indarkeria hori”. Horren hamaika adibide eman dituzte: “indarkeria matxista da emakumeon* diru iturriak kontrolatzea, indarkeria matxista da kaletik begiradarekin akosatzea, eraso bat salatzen dugun bakoitzero gure hitza zalantzan jartzea, indarkeria matxista da gizonen arteko aliantzak eraikitzen eta sostengatzen jarraitzea eta hartu beharreko ardurei entzungor egitea, eta indarkeria matxista dira egunero pairatzen ditugun adibide gehiagoren zerrenda amaigabe bat, zoritxarrez.”.
Matxismoari aurre egiteko “egungo jarrera konplizeak” alde batera utzi eta “indarkeria matxista lehen mailako arazo politikotzat hartua izan dadin eskatzen” dute, eta horretarako “beharrezko baliabideak eskaini” behar dira. Izan ere, indarkeria matxistaren biktima diren emakume eta haurrek “arreta psikologikoa jasotzeko itxaron zerrenda luzea dutela” salatu dute, “eta hori ez da posible”.
Elkarretaratzean argiki adierazi zuten “feminismoaren bidea dela soilik gizartea errotik aldatuko duen bidea”, eta norabide horretan “autodefentsarako deia” egin dute, baita gizartea aldatzeko “feministak batzekoa” ere. “Sistema patriarkala suntsitu arte” borrokan eta “kaleak hartzen” jarraitzeko deia egin dute feminista oiartzuarrek, “denak aske izan arte”.
