San Pedroko kioskoa kenduko du Udalak
Sanpedrotarrekin egindako bilera irekian kioskoa kentzea eta plaza erabilera publikorako uztea erabaki zen. Astelehenean hasiko dira lanak.
San Pedroko kioskoarekin egin beharrekoa erabakitzeko, bizilagunekin bilera irekia antolatu zuen Pasaiako Udalak. Bertan, Udalaren bi proposamen aurkeztu zitzaizkien herritarrei; lehena, kioskoa birgaitu eta Torreko plazara lekualdatzea; bigarrena, kioskoa kendu eta “plaza erabilera publikorako berreskuratzea”.
Udal gobernuak bigarren aukera hobesten zuen, Laura Re Lozano Partaidetzak zinegotziak azaldu zuenez, “birgaitzeak eta birkokatzeak zuten kostua oso desproportzionatua baitzen gaur egun Pasaiak dituen eta gizarte eta hirigintza premiak kontuan hartuta”. Izan ere, kioskoa Torreko plazara mugitzeak 150.000 eta 200.00 euro arteko kostua izango luke. Kioskoa kendu eta plaza berreskuratzeak, ordea, 7.000 eurokoa.
Bilera irekira 40 bizilagun inguru gerturatu ziren, eta babes zabala lortu zuen kioskoa kendu eta plaza erabilera publikora bideratzearen aldeko proposamenak; 10 pertsonatik 7ren babesa, hain zuzen ere. Eskertua agertu da Miguel Mari Torrea San Pedroko alkateordea bizilagunen parte hartzearekin, “bai entzutera bai proposamen berriak egitera” joan izanagatik.
Hala, astelehenean, hilaren 12an, hasiko dira kioskoa kentzeko lanak, eta hiru edo lau egun iraungo ditu. Gutxi gorabehera BEZaz gain 5.750 euroko aurrekontua eskatuko du. Kioskoa erretiratzerakoan, Udalak “liberatutako espazioa birgaituko du erabilera publikorako”.
