Arantxa Otegi baserritarra izango da madalenetako omendua
Otegi zehazki izendatu badu ere herritarren batzordeak, proposamena egin dutenek herriko baserritarrei aitortza egiteko baliatu dute izendapena.
Madalenetako omendua aukeratzeko herritar batzordea. Arantxa Otegi baserritarra izango da madalenetako omendua. Hala erabaki du ausaz eratutako 19 herritarren batzordeak. Larreaundi baserrikoak piztuko du aurtengo jaietako txupina, eta hura proposatu dutenek, herriko baserritarrei oro har aitortza egiteko baliatu nahi dute izendapena.
Erabakia hartu duten herritarrek hiru argudio nagusi eman dituzte: aniztasuna, lan isilaren bidez herriari egindako ekarpena, eta Otegiren kasuan emakumeen ekarpena. Aniztasunarekin udalerriari landa eremuak aniztasuna dakarkiola adierazi du herritarren batzordeak. Lan isilaren inguruan, berriz, natur ingurunearen zaintza, kalitatezko elikagaiak ekoiztea, eta bertatik bertara produktuak merkaturatzea aipatu dituzte. Azkenik, emakume baserritarrak omendu nahi izan dituela azaldu dute Otegiren bidez.
Herritarrek hartutako erabakia hilaren 27an egingo den plenoan jakinaraziko dute.
Aukeraketa sistema duela bi urte onartu zen; herriko jaietan omenaldi sariak emateari buruzko ordenantza arautzailearen ondorio da. Iaz sartu zen indarrean araudi hori, eta bere ekarpenen artean daude omendu proposamenak egiteko aukera herritar orori zabaltzea. Azken erabakia, berriz, ausaz aukeratutako herritar batzorde baten esku uzten da. Madalen jaiak herrikoiagoak izatearekin batera, herritarrak udal kudeaketan parte hartzea ere bilatzen du.
Erabakitze prozesua
Martxoaren 1etik 30era Errenteria-Oreretan erroldatutako herritarrek, eragile zein elkarteek eta udalean ordezkaritza duten alderdi politikoek hautagaiak aurkeztu zituzten. Proposamenak jasota, zerrenda egin zuten zerbitzu juridikoek. Hamahiru hautagai proposatu zituzten, eta horietako hiru kanpoan utzi aurretik ere omenduak izan direlako. Udaleko bozeramaileen batzordeak hirura jaitsi zuen zerrenda hori.
Udal errolda erabilita, berriz, zozketa egin zen 800 pertsona aukeratzeko, 16 urtetik gorakoak. Gonbidapena onartu zutenen artean zozketa egin, eta 19 lagun hautatu zituzten batzordea aukeratzeko. Hilaren 7an eta 14an bilerak egin ditu batzorde horrek. Lehen saioan hautagaien berri jaso zuten. Bigarrenean berriz, aukeraketa egin zuen batzordeak, argudioak adostuta.
Aizpea Otaegi alkateak zuzenean jakinarazi dio Otegiri berak piztuko duela jaiei hasiera emango dien txupina aurten, eta sare sozialen bidez zabaldu deiaren une hori (klik hemen).
